انوار اسلام |
س کتاب ک |
*** حضرت ہاشم بن عتبہؓ نام ونسب ہاشم نام، ابو عمر کنیت، مر قال لقب، نسب نامہ یہ ہے،ہاشم بن عتبہ بن ابی وقاص ابن اہیب بن عبد مناف بن زہرہ قرشی زہری، ہاشم مشہور صحابی حضرت سعد ؓبن ابی وقاص فاتح ایران کے بھتیجے ہیں۔ اسلام فتح مکہ میں مشرف باسلام ہوئے۔ فتوحات میں شرکت شجاعت وشہامت ان کا خاندانی جوہر تھا،بہت آخر میں اسلام کے شرف سے مشرف ہوئے تھے، اس لیے حیاتِ نبویﷺ میں اس کے مظاہرہ کا موقع نہ ملا، سب سے اول فاروقی عہد میں ان کے جو ہر نمایاں ہوئے،شام کی فتوحات میں خالد ؓبن ولید کے دوش بدوش داد شجاعت دی، یرموک کی مشہور جنگ میں ایک آنکھ شہید ہوئی۔ (استیعاب:۲/۶۱۷) اس زمانہ میں پورے شام اورایران میں جنگ چھڑی تھی، ہاشم دونوں میں شریک ہوئے،ایران کی معرکہ آرائیوں کے سلسلہ میں قادسیہ کا معرکہ نہایت اہم ہے،اس کیلئے حضرت عمرؓ نے دارالخلافہ سے جو منتخب بہادر بھیجے تھے، اس میں ایک ہاشم بھی تھے؛چنانچہ وہ حضرت عمرؓ کے حکم سے چھ ہزار کی جمعیت کے ساتھ شام سے روانہ ہوئے اورٹھیک تیسرے دن ایران کے حدود میں پہنچے اور یرموک کے معرکہ میں شریک ہوئے،اس جنگ میں انہوں نے اپنی شجاعت کے نہایت حیرت انگیز مناظر دکھائے اور ایسے کارہائے نمایاں کئے کہ مجاہدین قادسیہ میں کوئی بھی ان کے کارناموں کو نہ پہنچ سکا، فاتحین قادسیہ میں ان کانام سر فہرست ہے۔ (استیعاب:۲/۶۱۷) مدائن کی فتح کے بعد جب یزد گرد نے جلولاء میں تیاریاں شروع کیں اورسعد بن ابی وقاصؓ کو اس کی خبر ہوئی تو انہوں نے ہاشم کو بارہ ہزار فوج کے ساتھ اس کے مقابلہ کو بھیجا، ان کے جلو لا پہنچنے سے پہلے ایرانی تمام انتظام مکمل کرکے مقابلہ کے لئے تیار ہوچکے تھے اور ہر ایرانی نے میدان جنگ میں جان دیدینے کا عہد کرلیا تھا اوران کے پاس حلوان سے امداد پر امداد چلی آرہی تھی۔ اس لیے ہاشم کے آنے کے بعد مسلمانوں نے طے کیا کہ بلا کسی توقف وانتظار کے حملہ کردینا چاہیے، ورنہ ایرانیوں کی امدادی فوجوں کا سلسلہ ان کی قوت بہت بڑھادیگا، اس وقت مقابلہ میں زیادہ دشواری ہوگی، اس فیصلے کے بعد مسلمانوں نے جنگ چھیڑ دی، پہلے تیر چلے پھر تیر سے نکلے، آخر میں تلوار کی نوبت آئی،اوراس گھمسان کی جنگ ہوئی کہ تلواروں کی دھاریں الٹ الٹ گئیں، ایرانی برابر کا جواب دے رہے تھے، آخر میں مسلمانوں نے ہر طرف سے سمٹ کر ایسا زبردست حملہ کیا کہ ایرانیوں کے پاؤں اکھڑ گئے، اوروہ میدان چھوڑ کر بھاگ نکلے، مسلمان صبح سے شام تک تعاقب کر کے مارتے رہے،شام کی تاریکی میں مجبوراً علیحدہ ہونا پڑا۔ اس شکست فاش کے بعد یزد گرد حلوان چلا گیا اورمسلمان دجلہ کے مشرقی ساحل کے دیہاتوں پر قبضہ کرتے ہوئے،مہرور پہنچے، یہاں کے باشندوں نےجزیہ دیکر اطاعت قبول کرلی،مہرور کے بعد بند فین پہنچے، یہاں کے باشندوں نے بھی جزیہ دیکر اطاعت قبول کرلی،خانقین میں ایرانیوں کا ایک جتھا باقی رہ گیا تھا اسے جریر بن عبداللہ بجلی نے ہٹادیا اورسواددجلہ کا پورا علاقہ ہاشم کے زیر قیادت تسخیر ہوگیا اس کے بعد ہاشم اوراشعث بن قیس ،وقوقا،خانپجار ہوتے ہوئے باجری کے اضلاع کو فتح کرتے ہوئے اسن بار کو عبور کرکے شہرزور کی سرحد تک پہنچ گئے۔ (یہ تمام واقعات فتوح البلدان بلاذری:۲۷۲،۲۷۴،سے ماخوذ ہیں) جلولار کا معرکہ اپنی اہمیت کی وجہ سے فتح الفتوح کہا جاتا ہے،اس میں دس لاکھ مال غنیمت مسلمانوں کے ہاتھ آیا،اس کی کامیابی تمامتر ہاشم کی کوششوں کا نتیجہ تھی۔ جنگ جمل اس کے بعد جب خانہ جنگی کا دور آیا اور مسلمانوں کی تلواریں آپس ہی میں چلنے لگیں تو ہاشم کی حق پرست تلوار حقدار کی حمایت میں بے نیام ہوئی،ان کا رجحان ابتدا ہی سے حضرت علیؓ کی جانب تھا؛ چنانچہ حضرت عثمانؓ کی خبر شہادت سن کر حضرت ابو موسیٰ اشعریؓ سے کہا کہ اب اس امت کے بہترین فرد کے ہاتھوں پر بیعت کرلینی چاہیے، ابو موسیٰ نے کہا ابھی جلدی کی کیا ضرورت ہے،لیکن ہاشم کو توقف گوارا نہ تھا،انہوں نے حضرت علیؓ کی خدمت میں جانے تک کی تاخیر گوارا نہ کی اوراپنا ایک ہاتھ دوسرے ہاتھ پر رکھ کر کہا یہ علیؓ کا ہاتھ ہے اوریہ میرا، میں بیعت کرتا ہوں، جب حضرت علیؓ نے جنگ جمل کی تیاریاں شروع کیں ،توحضرت حسنؓ حضرت عمار ؓبن یاسر اور ہاشم کو کوفیوں کو آمادہ کرنے کے لیے کوفہ روانہ کیا (اخبار الطوال:۱۵۳) اوراس کے بعد جب جنگ جمل کا آغاز ہوا تو ہاشم شروع سے آخرتک حضرت علیؓ کے ساتھ اوران کے دست راست رہے۔ جنگ صفین جنگ جمل کے بعد صفین میں بھی پیش پیش تھے اوروقتاً فوقتاً کوفی فوجوں کو لیکر شامیوں کے مقابلہ میں نکلے تھے،اشہر حرم میں التوائے جنگ کے بعد جب دوبارہ جنگی تیاریاں شروع ہوئی تو حضرت علیؓ نے بڑا علم ہاشم کو مرحمت فرمایا۔ شہادت آخری فیصلہ کن معرکوں کے سلسلہ میں ایک دن پھر حضرت علیؓ نے ہاشم کو علم برداری کا اعزاز بخشا انہوں نےعلم برداری کا پورا حق ادا کردیا،صبح سے شام تک مسلسل لڑتے رہے،شام کی تاریکی میں ان کے ساتھیوں کے پاؤں اکھڑ گئے،مگر وہ اپنے خاص آدمیوں کے ساتھ برابر جمے رہے،حارث بن منذر تنوخی نے نیزہ سے زخمی کردیا، زخم بہت کاری تھا،لیکن ہاشم کے استقلال میں فرق نہ آیا، وہ اسی طرح لڑتے رہے،اسی درمیان میں حضرت علیؓ کا پیام پہنچا کہ علم آگے بڑھاتے جاؤ، ہاشم نےپیام لانے والے سے کہا، کہ تم میری حالت کا مشاہدہ کرتے جاؤ ،اس نے پیٹ پر نظر ڈالی تو دیکھا کئی شگاف پڑے ہوئے تھے،زخموں نے بالکل نڈھال کردیا تھا؛چنانچہ قاصدکی واپسی کے بعد ہی وہ زمین پر گر پڑے،ان کے گرنے سے ان کے باقی ماندہ ساتھیوں کے بھی پاؤں اکھڑ گئے اورہاشم نے اسی محشر ستان قتال میں جان دیدی ۔ اس معرکہ میں ان کا ایک پاؤں کٹ کر الگ ہوگیا تھا،لیکن شجاعت کا یہ عالم تھا ،کہ اس کٹے ہوئے پاؤں کو زمین پر ٹیک کر لڑتے تھے اور یہ رجز پڑہتے جاتے تھے، الفحل یحمی شوکہ معقول اولاد ان کی اولاد میں عبداللہ ان کے خلف الصدق اوربڑے نامور فرزند تھے،ہاشم کی شہادت کے بعد حضرت علیؓ نے ان کو علم مرحمت فرمایا تھا۔ (اخبار الطوال :۱۹۵،۱۹۶) فضائل واخلاق ہاشم اس شجاعت وشہامت کے ساتھ دوسرے محاسن اخلاق سے بھی آراستہ تھے، علامہ ابن اثیر لکھتے ہیں، کان من شجعان الابطال والفضلاء الاخیار ہاشم بڑے نامور بہادروں اوراخیار فضلاء میں تھے۔ (اسد الغابہ:۵/۷۴۹)