ملفوظات حکیم الامت جلد 26 - یونیکوڈ |
استغناء اور کبر میں فرق فرمایا استغناء اور کبر میں بڑا فرق ہے ـ کبر تو مذموم ہے اور استغناء محمود ہے مگر غلو استغناء میں بھی اچھا نہیں ـ البتہ غلو فی الاستغناء یعنی اہل کبر کے مقابلہ میں عالی دماغی اچھا ہے اور خلو سب سے اچھا ہے یعنی کسی طرف التفات نہ ہو ـ تعویذات میں نقوش حرف کا بدل ہیں فرمایا تعویذات میں اصل تو حروف و الفاظ ہیں جو پڑھے جائیں مگر جو لوگ نہیں پڑھ سکتے ان کے واسطے حروف کا بدل یہ نقوش ہیں جیسا کہ حصن حصین کی روایت سے معلوم ہوتا ہے ـ و من لم یعقلھا کتبھا فی صک و عقلھا فی عنقہ ـ مدرسہ نیچروں کی اصلاح کیلئے فرمایا ـ فلاح مدرسہ کے اختلاف کی نسبت کسی نے بہت عمدہ لطیفہ کہا ہے کہ مدرسہ تو نیچریوں کی اصلاح کیلئے تھا ، نہ یہ کہ نیچری مدرسہ کی اصلاح کریں جیسا کہ اس وقت چاہتے ہیں حکایت مولانا محمد قاسم صاحبؒ فرمایا ، مولانا محمد قاسم صاحبؒ رام پور تشریف لے گئے آپ کو نواب کلب علی خاں والی رامپور نے بلایا ـ مولانا نے جواب دیا کہ میں ایک دیہاتی آدمی ہوں آداب شاہی سے نا واقف ہوں اس واسطے آپ کو میرے آنے سے تکلیف ہو گی ـ انہوں نے کہا ہم خود آپ کا ادب کریں گے نہ کہ آپ سے ادب کا مطالبہ کریں ـ ضرور تشریف لائیے مجھ کو بیحد اشتیاق ہے ـ اس پر مولاناؒ نے فرمایا سبحان اللہ اشتیاق تو آپ کو اور ملنے کو میں آؤں ـ دعا کرو کہ مجھے بھی اشتیاق پیدا ہو جائے پھر ملاقات کر لوں گا ـ سفید جھوٹ یا سیاہ جھوٹ فرمایا ـ جھوٹ تو سیاہ ہوتا ہے خدا جانے اس محاورہ کی کیا وجہ ہے کہ یہ سفید جھوٹ ہے کیونکہ معاصی سب ظلمات ہیں ـ