ملفوظات حکیم الامت جلد 26 - یونیکوڈ |
سے عرض کیا کہ دعا فرماویں ۔ حضرت نے فرمایا کہ اگر رائے تو دیو بند ایک مدرس کی جگہ خالی ہے ، لکھ دوں ۔ میں نے عرض کیا کہ حضرت حاجی صاحبؒ نے فرمایا تھا کہ جب کانپور سے تعلق نہ رہے تو پھر کسی جگہ تعلق نہ کرنا ۔ اگر آپ فرمائیں تو میں کر لوں گا اور میں یہ خیال کرتا ہوں کہ یہ بھی حضرت حاجی صاحبؒ کا حکم ہے ۔ ایک ذات کے دو حکم ہیں ۔ ایک مقدم وہ منسوخ ، دوسرا مؤخر وہ ناسخ ۔ الحمد للہ کہ یہ جواب مخاطب کی برکت سے سمجھ میں آیا ۔ ( کاتب الحروف عرض کرتا ہے کہ علماء ظاہر اپنے دل کو ٹٹولیں کہ ہم اسی طرح جواب دیتے ۔ قیامت تک نہ ہو سکتا ) اس پر حضرت مولانا گنگوہیؒ نے فرمایا کہ پھر حضرت حاجی صاحبؒ کے فرمانے پر عمل کرو ۔ ان شاء اللہ کوئی پریشانی نہ ہو گی ۔ حضرت نظام الدین صاحب دہلویؒ کے پاس حاضر ہونے والے دو شخصوں کی حکایت فرمایا حضرت نظام الدین صاحب دہلویؒ کی خدمت میں دو شخص آ ئے ۔ آپس میں گفتگو کر رہے تھے ایک نے کہا کہ ہمارے ہاں کا حوض یہاں کے حوض سے بہت بڑا ہے ۔ حضرتؒ نے سن لیا ۔ فرمایا کیا تم نے ناپا ہے کہا نہیں ۔ فرمایا جاؤ ناپ کر آؤ ۔ مہینوں کا راستہ طے کر کے گیا وہاں جا کر ناپا تو ایک بالشت زیادہ نکلا ۔ بہت خوش آیا کہ بات صحیح رہی ۔ آ کر عرض کیا ۔ حضرت نے فرمایا تھا کہ تم نے تو کہا تھا کہ بہت بڑا ہے ۔ ایک بالشت بڑے کو بہت بڑا نہیں کہتے ۔ جاؤ تم کو مرید نہیں کرتا ۔ طبیعت میں احتیاط نہیں ۔ مجذوبین کشف سے کہتے ہیں فرمایا مجذوبین صرف حا کی ہوتے ہیں ۔ مستقبل یا حال یا ماضی کی بات جو کچھ کہتے ہیں وہ کشف ہوتا ہے ۔ سیاہ مرچ بیداری اور دماغ کو مفید ہے فرمایا سیاہ مرچ سے بیداری بھی حاصل ہوتی ہے اور دماغ کو بھی مفید ہے ۔