خزائن الحدیث |
 |
محبوبیت عند اللہ کے دوام کا طریقہ تو وضو کی دعا کے متعلق اللہ نے مجھے یہ علمِ عظیم عطا فرمایا کہ مُتَطَھِّرِیْنَ بابِ تفعل سے ہے یعنی تکلیف اُٹھاکر طہارت حاصل کرو، طہارتِ قلبیہ بھی اورطہارتِ قالبیہ بھی، دل بھی پاک ہواور جسم بھی پاک ہو، تو اس کا فائدہ کیا ملے گا؟ تم چوبیس گھنٹے اللہ کے محبوب رہو گے۔ یہ نہیں کہ وضو کے وقت یہ دعا پڑھ لی اور نماز کے وقت تک پاک صاف رہے لیکن جب مارکیٹ گئے، کلفٹن گئے، الفنسٹن اسٹریٹ گئے تو نظر خراب کر لی اور تمہاری طہارت متأثر ہو گئی تو جب طہارتِ باطنی سے اور توبہ کی برکت سے محبوبیت میں جو جگہ ملی تھی، جب بھی توبہ کے دائرہ سے اور طہارت کے دائرہ سے خروج اختیار کرو گےتو دائرۂ محبوبیت سے بھی تمہارا خروج ہو جائے گا، اس وقت گناہ کی حالت میں تم اللہ کے پیارے نہیں رہو گے۔ دیکھا آپ نے طہارت اور توبہ کا یُحِبُّسے کیا جوڑ لگا کہ اللہ تعالیٰ تم کو محبوب رکھتے ہیں جب تک تم دائرۂ توبہ سے اور دائرۂ طہارت سے خروج اختیار نہیں کرتے اور اللہ تعالیٰ نے مضارع استعمال فرمایا جو حال اور استقبال کے لیے ہوتا ہے یعنی زندگی بھر جب تک تم توبہ کرتے رہو گے تو ہماری محبوبیت سے تمہارا خروج اور (exit)نہیں ہو گا۔ کیوں کہ ساؤتھ افریقہ کے علماء بیٹھے ہیں ان کی مادری زبان انگریزی ہے اس لیے تھوڑا سا انگریزی لفظ بول دیتا ہوں۔ تو آپ لوگ بتائیے! آپ کیا چاہتے ہیں کہ ہم ہر وقت اللہ کے پیارے رہیں یا کبھی پیارے رہیں اور کبھی غیر پیارے رہیں، یعنی کبھی اللہ کے پیارے رہیں اور کبھی اللہ کے پیار سے محروم رہیں؟ تو جب پیار دائمی چاہتے ہیں تو یہ دونوں صفات اپنے اندر پیدا کر لیجیے۔۱)تَوَّابِیْنَ کی اور۲)مُتَطَھِّرِیْنَکی۔ مُتَطَھِّرِیْنَ کے بارے میں مفسرین لکھتے ہیں کہ یہاں مراد طہارتِ باطنی اور طہارتِ قلب ہے کیوں کہ اصل طہارت یہ ہے کہ غیر اللہ سے ہمارا فاصلہ رہے، کسی طرح سے بھی ہمارا قلب ایک اعشاریہ، ایک ڈگری بھی اللہ سے نہ ہٹے۔ جہاں ہٹنے کا اثر محسوس ہونے لگے اور دیکھے کہ کسی حسین کی طرف دل جھکا جارہا ہے وہاں سے راہِ فرار اختیار کرو۔ جب تک اس کے ٹارگٹ اور اس کے محاذات سے آگے نہیں بڑھو گے تمہارے قلب کا قبلہ صحیح نہیں رہے گا۔ یہ فَفِرُّوْۤا اِلَی اللہِ کی تفسیر ہے کہ غیر اللہ سے بھاگو اور غیر اللہ سے ہر وہ چیز مراد ہے جس سے آپ کے قلب کا قبلہ متأثر ہو اور ایک اعشاریہ بھی اللہ سے دور ہو۔ جو دل اللہ تعالیٰ سے ایک اعشاریہ بھی دور نہ ہو گا ایسے دل کو اپنی ذاتِ پاک سے اللہ تعالیٰ ایسے چپٹا لیں گے کہ سارا عالَم اسے ایک اعشاریہ اپنی طرف مائل نہ کرسکے گا۔ بتاؤ یہ علمِ عظیم پیش کر رہا ہوں یا نہیں؟ جس کی قسمت میں اللہ کی محبت ہوتی ہے وہ اپنے شیخ کی باتوں کو عظمت و محبت سے سنتا ہے۔ ------------------------------