جمعہ اور عیدین کے مسائل و احکام |
 |
پانچواں عمل: جمعہ کی شب درود شریف کثرت سے پڑھنا : جمعہ کی شب کے اعمال میں سے ایک اہم عمل اللہ کے نبی ﷺپر کثرت سے درود شریف پڑھنا ہے ، احادیثِ مبارکہ میں خصوصیت کے ساتھ جمعہ کی شب میں درود شریف پڑھنے کے فضائل ذکر کیے ہیں ، ذیل میں چند فضائل احادیث کی روشنی میں ذکر کیے جارہے ہیں : ایک روایت میں جمعہ کی شب درود شریف پڑھنے کی یہ فضیلت ذکر کی گئی ہے کہ اُس کی سو حاجتیں اللہ تعالیٰ پوری کرتے ہیں ۔ چنانچہ حضرت انسسے نبی کریمﷺکا یہ اِرشاد مَروی ہے: بے شک قیامت کے دن ہر موقع پر تم میں سے سب سے زیادہ میرے قریب وہ ہوگا جو دنیا میں مجھ پر کثرت سے درود پڑھتاہوگا۔جس نے جمعہ کے دن اور جمعہ کی شب میں مجھ پر درود بھیجا اللہ تعالیٰ اُس کی سو حاجتیں پوری فرمائیں گےجن میں سے ستر حاجتیں آخرت کی اور تیس حاجتیں دنیا کی ۔پھر اللہ تعالیٰ اُس درود پر ایک فرشتہ مقرر کردیتے ہیں جو ا ُس کو میرے پاس قبر شریف میں لے کر آتا ہے اسی طرح جیسا کہ تمہارے پاس ہدایا و تحائف پیش کیے جاتے ہیں ، وہ فرشتہ مجھے اُس درود پڑھنے والے کے نام و نسب اور خاندا ن کے بارے میں پوری تفصیل بتاتا ہے، پس میں اُسے اپنے پاس روشن اور چمکتے ہوئے صحیفہ میں محفوظ کرلیتا ہوں۔إِنَّ أَقْرَبَكُمْ مِنِّي يَوْمَ الْقِيَامَةِ فِي كُلِّ مَوْطِنٍ أَكْثَرُكُمْ عَلَيَّ صَلَاةً فِي الدُّنْيَا مَنْ صَلَّى عَلَيَّ فِي يَوْمِ الْجُمُعَةِ وَلَيْلَةِ الْجُمُعَةِ، قَضَى اللهُ لَهُ مِائَةَ حَاجَةٍ، سَبْعِينَ مِنْ حَوَائِجِ الْآخِرَةِ، وَثَلَاثِينَ مِنْ حَوَائِجِ الدُّنْيَا، ثُمَّ يُوَكِّلُ اللهُ بِذَلِكَ مَلَكًا يُدْخِلُهُ فِي قَبْرِي كَمَا يُدْخِلُ عَلَيْكُمُ الْهَدَايَا، يُخْبِرُنِي مَنْ صَلَّى عَلَيَّ بِاسْمِهِ وَنَسَبِهِ إِلَى عَشِيرَتِهِ فَأُثْبِتُهُ عِنْدِي فِي صَحِيفَةٍ بَيْضَاءَ۔ (شعب الایمان:2773)