اٹھاتے ہی منزل پر ہوتا ہے۔ آخری مذہب ہونے کے یہ معنی نہیں ہوسکتے کہ اس کے ظہور کے بعد فوراً ہی ہستی فنا ہو جائے اور ارض غیرالارض سے بدل جائے۔ اگر یوں مقدر ہوتا تو اس کے یہ معنی تھے کہ انسانی حیات کا اصلی مہر تابندہ چند لمحوں کے لئے افق پر نمودار ہوتا اور پھر الٹے پاؤں وہیں غروب ہو جاتا۔ یہ آخری عہد کم ازکم اس قدر لمبا ہونا چاہئے تھا اور ہورہا ہے کہ تمام دنیا یعنی اس کے تمام اقوام ومذاہب زینہ بہ زینہ اسباب وعلل کو پیدا کرتے اور ارتقاء کے تمام کرشمے دکھاتے۔ بالآخر باہم دگر اس طرح جذب ومتحد ہوں کہ تمام کی تمام نوع انسان ایک اخوت کے سلسلہ میں بندھ جائے اور نسل وطن کی تمام قیدوں کو چھوڑ کر اس طریق پر حبل اﷲ سے اعتصام کرے کہ شرقی وغربی عربی وعجمی کی سب تمیز مٹ جائے۔ اسلام کا دنیا اور اس کی اقوام پر یہ اثر ہورہا ہے یا نہیں۔ چشم بصیرت سے اوجھل نہیں۔ ہم یہ لکھ رہے ہیں اور جانتے ہیں کہ یہ الفاظ سن کر ہزاروں کے دل میں آئے گا کہ بحالات موجودہ دنیا تو اسلام کو زوال میں دیکھ رہی ہے۔ یہ کس بناء پر کہہ رہے ہیں کہ اسلام کے تمام نوع کو متحد ومنسلک کرنے کے اثرات اقوام پر اپنا ڈورہ ڈال رہے ہیں۔ یہ ایک وسیع اور گہرا مضمون ہے۔ جس پر بحث اس مضمون کی حدود سے خارج ہے اور اگر کی گئی تو ایک بے محل گریز ہوگی۔ یہ اشارہ کر دینا کافی ہوگا کہ اسلام ایک چوتھائی انسانوں کو بلاواسطہ اپنے اندر داخل کر چکا ہے۔ تمام نوع سے وہ بت پرستی اور اوہام پرستی چھڑا چکا ہے۔ جو تمام روحانی ومادی ترقی کے لئے سنگ راہ تھی۔ عیسائیوں، یہودیوں، ہندوؤں کے مذاہب میں جتنے اصطلاحی انقلاب پیدا ہوئے ہیں۔ وہ سب اس کے ظہور کے بعد ہوئے ہیں اور اسی کے اثر کا نتیجہ ہیں۔ ان مذاہب کے نئے فرقے اگر بالکلیت نہیں تو نیم اسلامی ضرور ہیں۔ توحید کا مہر عالم تاب تمام عالم پر چمک رہا ہے۔ رسالت کے مہ چاردہم کی کرنیں منکرین ہرجگہ جلوہ فگن دیکھ رہے ہیں۔ اگر اندرون خانہ ابھی نہ گھسنے دیں تو یہ وقت کا انتظار ہے۔ بات قبضہ سے باہر ہوئی جارہی ہے۔ اقوال میں اگر کچھ نہیں مانتے۔ اعمال میں سب کچھ تسلیم کر رہے ہیں۔ زبانیں اظہار تسلیم میں بخل کریں اور گنگ رہیں۔ دل اندر ہی اندر معترف ہوئے جارہے ہیں۔ یہ وہ شراب ہی نہیں جو مدت العمر چھپ چھپ کر پی جاسکے۔ وقت قریب ہے کہ اس مستی کا تشنہ لب قیود ورسوم کے پردوں سے باہر آجائے اور پھوٹ کر منہ سے ببانگ دہل کہہ دے کہ ؎
تاکے درون پیرہن اوبیم محتسب
پنہاں کنم چوغنچہ نرگس پیالہ را
