ملفوظات حکیم الامت جلد 26 - یونیکوڈ |
دوسرے کیلئے اولاد کی دعا ایک شخص نے خط لکھا کہ میرے لئے دعا کیجئے اللہ تعالی اولاد عنایت فرماویں ـ اور ساتھ ہی یہ بھی لکھا کہ جب آپ اپنے لئے دعا نہیں فرماتے تو میرے لئے کیسے دعا فرمائیں گے ـ اس پر فرمایا کہ تمہارے لئے دعا کروں گا ـ کیونکہ مجھے تو اولاد کی خواہش نہیں تعلقات سے جی گھبراتا ہے اور تم کو خواہش ہے تمہارے لئے دعا کروں گا ـ پھر فرمایا کہ میں تو مجنون ہو جاتا اگر اولاد ہوتی ـ عقیدت اور محبت کا ایک ادب فرمایا اگر کسی سے عقیدت اور محبت ہو تو اس کے ساتھ خواہ اختلاف ہو جائے مگر خلاف نہ ہو چاہیے ـ فرمایا دین سے کامل مناسبت بزرگوں کی صحبت ہی سے ہوتی ہے کتابوں سے نہیں ہوتی اسی وجہ سے کسی نے کہا ؎ جملہ اوراق و کتب درنار کن سینہ راز نور حق گلزار کن تہذیب کی قسمیں فرمایا میں حیدر آباد گیا تو وہاں کے لوگوں کو دیکھا کہ بہت ہی تکلفات کرتے ہیں ـ میں نے دیکھا کہ تکلف کرتا ہوں تو تکلیف ہوتی ہے ـ نہیں کرتا تو بد تہذیب سمجھا جاتا ہوں میں نے ایک لطیفہ کیا یعنی اس کا علان کر دیا کہ ہم بھی مہذب ہیں مگر تہذیب تہذیب کی قسمیں ہیں ـ ایک یہاں کی تہذیب ہے مگر میں چونکہ اس سے نا واقف ہوں اس واسطے میں تھانہ بھون کی تہذیب برتوں گا ـ بس ہم اپنی اصلی حالت پر رہے حتی کہ حاضرین فرش پر بیٹھے رہے اور میں چار پائی پر بیٹھ گیا اور کہہ دیا کہ تھانہ بھون کی یہی تہذیب ہے ـ ہم ہر حال میں مہذب ہی رہے ـ لطیفہ قلب کا اہتمام سنت ہے فرمایا حضرت حاجی صاحبؒ فرماتے تھے صرف لطیفہ قلب کا اہتمام سنت ہے کیونکہ حدیث