کونے میں مناسب انداز میں کوئی کاغذی پھول وغیرہ بھی ضرور رکھیے‘ یہ کمرے کے حسن کو دوبالا کردیں گے۔
کپڑوں والے صندوق اس کمرے میں رکھیے جہاں مہمانوں کی آمدورفت نہ ہو۔ ان صندوقوں میں کھانے‘ پینے کی کوئی چیز نہ رکھیے۔ موقع بہ موقع انہیں دیکھتے رہیے کہیں ایسا نہ ہو کہ کپڑوں کو کیڑا لگ جائے۔
گھر میں جو چیز بے موقع نظر آئے اسے سٹور میں پہنچا دیجئے‘ دو وقت جھاڑو لگایئے‘ صفائی اس قدر رکھیے کہ ہر جگہ نماز پڑھی جا سکے۔ مہمان خانے میں اگر کوئی دری یا قالین کا ٹکڑا بچھا کر گاؤ تکیے لگا دیئے جائیں تو مہمانوں کو سکون سے بیٹھنے میں مدد ملے گی۔
قدرتی مناظر کی تصاویر کو مناسب انداز میں خوبصورت فریم میں لگا کر ہر کمرے میں کم از کم ایک فریم ضرور لگایئے۔ اتنی زیادہ بھی نہ لگایئے کے دیکھنے والے کو کوفت ہو۔ اور کمرہ کم، فریموں کی دکان زیادہ لگنے لگے۔
دیواروں پر ہلکے رنگ کا رنگ کروایئے‘ روشنی کا انتظام ایسا کیجیے کہ جو دیواروں کے رنگ کے مناسب اور دھیما دھیما ہو۔ تیز روشنی آنکھوں کو چبھتی ہے۔
صلہ رحمی:
رشتہ داروں سے محبت پیدا کی جائے‘ اگروہ دشمنی بھی کریں تو پھربھی دوستی کریں۔ جو آپ کے ساتھ برائی کرے آپ اس کے ساتھ بھلائی کریں۔ دوستوں سے تو سب ہی دوستی رکھتے ہیں مزہ تو یہ ہے کہ دشمنوں سے دوستی رکھی جائے‘ ان کے ساتھ بھلائی خدا کی خوشی ہے۔
اعزہ و اقرباء کی مدد کیجیے‘ ان کا ہاتھ بٹایئے‘ وقت پر قرض دیجیے‘ قرض دے کر احسان نہ جتلایا جائے‘ کبھی قرض کا تقاضا نہ کیجیے‘ اگر کسی بات پر بگڑ جائیں تو آپ نرم ہو جایئے۔
ان کے غصے کو ٹالنے کی کوشش کیجیے‘ یہ نفرت کو ختم کر دے گا۔ بری بات ٹال دیجیے‘ اس میں نہ پڑیئے‘ بخیل سے کبھی مطالبہ قرض نہ کیجیے‘ بخیل کا دل چھوٹا ہوتا ہے‘ وقت پر شرمندگی کا سامنا کرنا پڑے گا بلکہ اگر بخیل کوئی چیز مانگے اور آپ کی وسعت بھی ہو تو فوراً دے دیں وہ تھوڑے کو بھی بہت سمجھے گا۔
امیروں سے میل جول کم رکھیے‘ بے تکلفی میں انسان کی وہ قدر نہیں رہتی‘ جب تک شدید خواہش پیدا نہ ہو جائے ان کی زیارت کو نہ جایئے‘
