تہذیب حجاز ی کامزار (2)
یہاں تاریخ کی ایک اورعظیم شخصیت ہمارے سامنے آکھڑی ہوتی ہے۔یہ قاضی اسد بن فرات رحمہ اللہ تھے۔ بیک وقت بلند پایہ فقیہہ، نابغۂ روزگار محدث، انصاف پسند قاضی اور مجاہد ۔۱۴۲ھ میں پیدا ہوئے۔ ایک مجاہد گھرانے سے تعلق رکھتے تھے۔ دو برس کے تھے کہ ان کے والد انہیں لے کر افریقہ جانے والے اسلامی لشکر کے ساتھ شامل ہوئے۔اسد بن فرات کا بچپن وہیں گذرا، ابتدائی علوم شمالی افریقہ کے علماء سے حاصل کئے، جوان ہونے پر مدینہ منورہ پہنچے اور امام مالک رحمہ اﷲ سے مؤطا کادرس لیا، فقہی تشریحات کے ساتھ مؤطا کی احادیث سنیں، پھر بھی تشنگی دورنہ ہوئی تواستادسے اجازت لے کر کوفہ چلے آئے اور امام ابو حنیفہ کے جانشینوں امام محمد رحمہ اﷲ اور امام ابو یوسف رحمہ اﷲسے فقہ حنفی میں مہارت حاصل کی ۔ تین جلیل القدر ائمہ سے فیض پاکر قاضی اسد بن فرات ’’مجمع البحار‘‘ بن گئے ۔ مشرق و مغرب میں ان کی مقبولیت یکساں تھی۔عراق سے وہ مصر پہنچے اور وہاں فقہ مالکی کی عظیم کتاب ’’الاسدیہ‘‘ مرتب کی جس کی مشہور نقل ’’المدونۃ الکبریٰ‘‘ کے نام سے مقبولِ عام ہے جسے فقہ مالکی کی سب سے پہلی اور معتبر کتاب تسلیم کیا جاتا ہے۔ مصر سے وہقیروان (افریقہ) واپس آئے۔۲۰۳ھ میں انہیں قیروان کا قاضی بنا دیا گیا۔ انہوں نے اپنی ذمہ داریاں بخوبی نبھائیں، مالکی و حنفی نسبتوں کے جامع ہونے کی وجہ سے ہر دو طبقوں کے فقہاء ان کے فتاوٰی پر اعتماد کرتے تھے۔
یہ وہ دن تھے کہ قیروان کاحکمران خاندان بنواغلب سسلی کے قزاقوں سے پریشان تھا۔یہاں رومی بازنطینی حکمرانوں کا قبضہ تھا اور اس جزیرے کے نصرانی آئے دن مسلم مقبوضات پر حملے کرتے رہے تھے۔ قاضی اسد بن فرات رحمہ اﷲ ایک عرصے سے بحیرۂ روم کے اس زرخیز و شاداب جزیرے کو اسلامی مقبوضات میں لانے کے لئے بے تاب تھے ۔ اس سلسلے میں وہ حکام کو جھنجھوڑتے رہتے تھے۔
بالآخر قیروان کے گورنر زیادۃ اﷲ بن ابراہیم نے ان کے مشورے کے مطابق صقلیہ پر حملے کا فیصلہ کرلیا۔ چوںکہ مشاورت میں جنگی منصوبہ بندی قاضی اسد بن فرات کی رائے کے مطابق طے ہوئی تھی اس لئے گورنر کو لشکر کی قیادت کے لئے ان سے زیادہ موزوں شخصیت کوئی اورنظر نہ آئی۔ جب اس نے قاضی صاحب کو اپنے فیصلے سے آگاہ کیا تو قاضی صاحب کو حیرت ہوئی اس لئے کہ قاضی کے منصب کے ساتھ ساتھ سپہ سالاری کا عہدہ ایک بہت بڑا بوجھ تھا، تاہم گورنر نے انہیں مطمئن کرتے ہوئے کہا: ’’آپ قاضی کے منصب پر بھی برقرار رہیں گے اور لشکر کی قیادت بھی آپ کے ہاتھ میں ہوگی۔ آپ کو ’’قاضی امیر‘‘ کہا جائے گا۔‘‘
مؤرخین لکھتے ہیں: ’’افریقہ میں اس سے قبل کوئی ان دو عظیم عہدوں پر بیک وقت فائز نہیں ہوا تھا۔‘‘
۱۵ ربیع الاوّل ۲۱۲ھ کو قاضی اسد بن فرات رحمہ اﷲ ۷۰۰ بحری جہازوں کا بیڑا لے کر قیروان کے ساحل سے بحیرۂ روم میں اُترے۔ بیڑے میں ۷۰۰ سوار اور ۱۰ ہزار پیادہ مجاہدین تھے۔
تین دن کے بحری سفر کے بعد ۱۸ ربیع الاول کو اسلامی لشکر صقلیہ کے ساحلی شہر ’’ماذر‘‘ کے ساحل پر لنگر انداز ہوا۔انہوںنے کئی معرکوں میں حریف کو پسپا کرکے صقلیہ کے کئی شہر فتح کیے اور انہیں مسلمانوں کی مضبوط چھاؤنیوں میں تبدیل کردیا۔
آخرکار صقلیہ کا نصرانی حاکم مائیکل قیصر فیصلہ کن جنگ کے لیے تیارہوا۔اس نے روم اور وینس کے بادشاہ سے امدادی منگوائیں اور ڈیڑھ لاکھ سپاہی لے کر مقابلے پر نکل آیا۔یہ دیکھ کر بہت سے مسلمان گھبراہٹ کا شکار ہونے لگے۔قاضی اسد بن فرات رحمہ اﷲ نے مسلمانوں کوحوصلہ دلانے کے لئے اس خوش الحانی سے سورۂ یٰسین کی تلاوت کی کہ سب کے دل ایمان کے جوش اورجنت کے شوق سے لبریز ہوگئے۔اس کے بعد قاضی صاحب نے ایک ولولہ انگیز تقریر کی جس میں مجاہدین کو للکارتے ہوئے کہا: ’’مجاہدو! یہ وہی ساحلوں پر ڈاکہ زنی کرنے والے عجمی بھگوڑے ہیں جو چھپ کر یہاں جمع ہوگئے ہیں… یہ بھگوڑے غلام ہیں۔ خبردار ان سے مرعوب نہ ہونا۔‘‘
اس کے بعد وہ رجز پڑھتے ہوئے رومی لشکر کی طرف لپکے۔ اس جنگ میں رومیوں نے لشکرِ اسلام کے قائد کو شہید کرنے کے لئے پورا زور لگا دیا، انہیں یقین تھا کہ قاضی صاحب کا کام تمام ہوتے ہی مسلمان حوصلہ چھوڑ بیٹھیں گے، مگر اﷲ تعالیٰ نے قاضی صاحب کی حفاظت کی، وہ رومیوں سے لڑتے لڑتے بری طرح گھر گئے مگر پوری تندہی سے ہر حملے کا دفاع کرتے رہے۔ اس دوران انہوں نے کئی کاری زخم کھائے، وہ ہاتھ جس میں لشکر کا جھنڈا تھا خون سے رنگین ہوگیا مگر جھنڈا گرنے نہ دیا۔ ان کی ہمت و استقلال کے نتیجے میں آخرکار مسلمان یہ معرکہ جیت گئے اور جزیرے کا بڑا حصہ فتح ہوگیا۔
کچھ مدت بعد قاضی صاحب نے مزید پیش قدمی کی اور ’’سرقوسہ‘‘ کا محاصرہ کرلیا۔ یہاں بھی سخت لڑائی ہوئی جس میں قاضی صاحب شدید زخمی ہوئے اور انہی زخموں کی تاب نہ لاکر آخر کار ربیع الثانی ۲۱۳ھ (۸۲۸ء) میں شہادت پائی اور اسی جزیرے میں دفن ہوئے۔
قاضی اسدبن فرات کی شہادت کے بعدبھی رومیوں سے معرکے جاری رہے۔صقلیہ پچیس ہزارسات سومربع کلومیٹر رقبے کا بہت بڑاجزیرہ تھاجس میں درجنوں شہر تھے۔بنواغلب نے تیسری صدی ہجری کے وسط تک جزیرے کااکثر رقبہ فتح کرلیاتھا۔
صقلیہ یونانی اوررومی دورمیں اگرچہ فلسفیوں،شاعروں اورطبیبوں کاخطہ رہا تھا مگر مسلمانوں کی آمد سے قبل،یہ ادبی و فنی آثار پیوندِ خاک ہوچکے تھے اورسوائے قدیم عمارتوں اورکھنڈروں کے یہاں کوئی شے قابلِ دیدنہ تھی۔حکمران اور مذہبی اشرافیہ اپنی بالادستی کے لیے عوام کوجاہل رکھنا ناگزیرسمجھتے تھے۔ اذہان پر جمود طاری تھا اورفکر ونظر پر پہرے لگے تھے۔بنواغلب کے دورمیں مسلمانوں کے قدم،اس جزیرے میں جہاں جہاں پڑے،وہاں علوم وفنون کی بہار آگئی۔بقول اقبال
اک جہانِ تازہ کاپیغام تھا جن کاظہور
کھاگئی عصرِ کہن کوجن کی تیغِ ناصبور
مردہ عالم،زندہ جن کی شورشِ قُم سے ہوا
آدمی آزاد زنجیرِ توہّم سے ہوا
فاتحین کے ساتھ سینکڑوں علماء یہاں آکر بس گئے جن کی اکثریت اہلِ سنت اور فقہِ مالکی کی پیروکارتھی ۔جابجا مساجد ومدار س قائم ہوگئے ،جن سے متصل کتب خانوں اور حجروں میں تفسیر،حدیث، فقہ ،اصولِ دین ،تاریخ اورشعر وادب پر قابلِ قدر کام ہوتارہا۔۔
علمی میدان میں ان کامیابیوں کے باوجود،بنواغلب کی فتوحات کادھارا،آخری حدودکے قریب پر پہنچ کررُک گیا ۔اسی دوران رومیوں نے جزیرۂ مالٹاسمیت جنوبی اٹلی کے بعض شہرمسلمانوں سے چھین لیے۔ تیونس میں بنواغلب کا عمررسیدہ حکمران ابراہیم بن احمد اس صورتحال سے بہت پریشان تھا۔ آخر اس نے اپنے ادھیڑعمر بیٹے ابوالعباس کو ۲۸۷ھ میں صقلیہ کاگورنربنادیا۔ابوالعباس بڑا دلیر اورتجربہ کارانسان تھا۔ا س نے جنوبی اٹلی پر یلغار کی اورکئی شہر فتح کرنے کے بعد روم کی فصیل تک پہنچ گیا۔پوپ یوحنا نے سالانہ خراج دینا منظور کرکے بڑی مشکل سے مسلمانوں کو منایا۔
