خبر واحد کی دوسری تقسیم
خبر واحد عدد رواۃ کے اعتبار سے تین قسم پرہے۔(۱)مشہور۔(۲) عزیز۔(۳) غریب۔
مشہور… وہ حدیث ہے جس کے راوی ہر زمانے میں تین سے کم کہیں نہ ہوں۔
عزیز … وہ حدیث ہے جس کے راوی ہر زمانے میں دو سے کم کہیں نہ ہوں۔
غریب… وہ حدیث ہے جس کا راوی کہیں نہ کہیں ایک ہو۔
خبر واحد کی تیسری تقسیم
خبر واحد اپنے راویوں کی صفات کے اعتبار سے سولہ قسم پر ہے:(۱)صحیح لذاتہ۔ (۲) حسن لذاتہ۔(۳)ضعیف۔(۴) صحیح لغیرہ۔(۵) حسن لغیرہ۔(۶) موضوع ۔(۷)متروک ۔ (۸)شاذ۔(۹)محفوظ۔(۱۰) منکر۔(۱۱)معروف۔(۱۲)معلل۔(۱۳)مضطرب۔ (۱۴) مقلوب۔ (۱۵)مصحف۔ (۱۶)مدرج۔
صحیح لذاتہ… وہ حدیث ہے جس کے کل راوی عادل کامل الضبط ہوں اور اس کی سند
متصل ہو۔ معلل وشاذ ہونے سے محفوظ ہو۔
حسن لذاتہ… وہ حدیث ہے جس کے راوی میں صرف ضبط ناقص ہو۔ باقی سب شرائط
صحیح لذاتہ کے اس میں موجود ہوں۔
ضعیف… وہ حدیث جس کے راوی میں حدیث صحیح وحسن کی شرائط نہ پائی جائیں۔
صحیح لغیرہ… اس حدیث حسن لذاتہ کو کہا جاتا ہے۔جس کی سندیں متعدد ہوں۔
حسن لغیرہ… اس حدیث ضعیف کو کہا جاتا ہے ۔جس کی سندیں متعدد ہوں۔
موضوع … وہ حدیث ہے جس کے راوی پر حدیث نبوی میں جھوٹ بولنے کا طعن
موجود ہو۔
متروک… وہ حدیث ہے جس کا راوی متہم بالکذب ہو یا وہ روایت قواعد معلومہ فی
الدین کے مخالف ہو۔
شاذ… وہ حدیث ہے جس کا راوی خود ثقہ ہو مگر ایک ایسی جماعت کثیر کی مخالفت
کرتا ہو جو اس سے زیادہ ثقہ ہیں۔
محفوظ… وہ حدیث ہے جو شاذ کے مقابل ہو۔