سہولت ہو تو ملتزم پر آئیں، حجر اسود اور کعبہ کے دروازہ کے بیچ میں ڈھائی گز کے قریب بیت اللہ کی دیوار کا جو حصہ ہے اس کو ملتزم کہتے ہیں، یہ دعا کی قبولیت کی خاص جگہ ہے، حدیث: اس سے رسول اللہﷺ اپنے چہرے اور اپنے سینے کو چمٹا لیتے تھے ۔
[شعب الایمان: ۴۰۵۹، عن عبداللہ بن عمرو رضی اللہ عنہ]
اگر موقع ملے تو لپٹ جائیں، سینہ اس سے لگائیں، کبھی دایاں کبھی بایاں رخسار اس پر رکھیں اور خوب رو رو کر دعاکریں۔ مگر اس طرح جانے کی کوشش ہرگز نہ کریں کہ دوسروں کو تکلیف پہنچے یا خود کے لئے خطرہ ہو جائے۔ ہر عمل میں اس کا خیال رکھیں۔ اس کے بعد زمزم پر آئیں، اب تو وہ کنواں نہیں ہے، جگہ جگہ پر نل لگے ہوئے ہیں، بیت اللہ کی طرف منہ کرکے پیٹ بھر کر زمزم کا پانی پئیں۔ شروع میں بسم اللہ اور اخیر میں الحمدللہ پڑھیں اور یہ دعا پڑھیں ’’اَللّٰہُمَّ اِنِّیْ اِسْئَلُکَ عِلْمًا نَّافِعًا وَرِزْقًا وَّاسِعًا وَّشِفَائً مِّنْ کُلِّ دَائٍ‘‘
[فتح القدیر: ۳/۵۰۶]
اے اللہ مجھے علم نافع عطا فرما، وسعت والی روزی عطافرما اور ہربیماری سے شفاء دے۔
