زندہ انسان بن کر ہمیں آملیں۔ مگر مرزا قادیانی نے پنجتن پاک سے بڑی بے اعتنائی کی کہ کچھ مدت انہیں اپنا مہمان رکھ کر اپنے مریدوں سے ان کی ملاقات نہ کرادی۔ ایسے مہمانوں کی مہمان داری میں کچھ خرچ بھی نہ ہوتا۔ نان شعیر(جوکی روٹی) اورکچھ کھجوریں کافی تھیں۔ پیلی بھیت کے چاول اسی طرح محفوظ رہتے۔قہقہہ۔ اور میں یقین دلاتا ہوں کہ شیعہ لوگوں کواگر مرزا قادیانی کے طفیل پنجتن پاک کی زیارت ہوجاتی تو مشرق سے مغرب اور شمال سے جنوب تک کے شیعے بے داموں مرزا قادیانی کے غلام بن جاتے ۔
چہارم… خلت کے معنے ہیں گزر گئے۔ جیسے ’’قد خلت سنت الاولین یا اذاخلو الی شیا طینہم(حجر:۱۳)‘‘وغیرہ وغیرہ۔ پس اس میں داخل ہیں کل نبی خواہ وہ اپنی موت مرے یا قتل کئے گئے۔ یا کسی اور طرح پر دنیا سے چلے گئے۔
پنجم… حضرت عیسیٰ علیہ السلام اور ان کی والدہ کو خدا ماننے والوں کی تردید میں اﷲ تعالیٰ شہادت پیش کرتا ہے کہ تم نے یعنی تمہارے باپ دادوں نے اپنی آنکھوں سے دیکھا کہ عیسیٰ علیہ السلام اور ان کی والدہ کھاناکھایا کرتے تھے۔ پھر تم ان کو خدا کس طرح مانتے ہو۔ خدا تو کھانا نہیں کھاتا۔ اس کی ذات ان باتوں سے پاک ہے۔ اگر خدا یہ فرماتاکہ حضرت عیسیٰ علیہ السلام کھانا کھاتے ہیں۔ جبکہ وہ آسمان پر ہیں تو یہ بذات خود ایک علیحدہ دعوے محتاج شہادت ہو جاتا۔
ششم لغایت ہشتم… یہ تینوں سوالات یا اعتراضات عام وخاص کے ماتحت آتے ہیں۔ کیونکہ حضرت عیسیٰ علیہ السلام کا خاص طور پر ان میں ذکر نہیں اورقرآن شریف سے اگر ثابت ہو جائے کہ ہر عام کے لئے کوئی خاص اورہر قاعدہ کے لئے کوئی استثناء ہوا کرتا ہے۔ تو یہ کل اعتراضات ایک کوڑی کے نہیں رہیں گے۔ اور اگر ایسا ثابت نہ ہو تو ہم جھوٹے اور مرزا قادیانی اور ان کے معتقدین سچے۔ کہیے بابو صاحب!آپ کو یہ فیصلہ منظور ہے یا نہیں؟
بابو صاحب… قرآن کریم سے جو بات بالبداہت ثابت ہو جاوے۔ وہ ہمارا ایمان ہے۔ اس سے کب انکار ہو سکتا ہے؟
نووارد… شاباش، شاباش!جزاک اﷲ! لیجئے! تو اب سنئے!اور صرف مختصر طور پر ،بہت مثالوں کی ضرورت نہیں۔ قرآن شریف میں ہے کہ اﷲ ہر چیز پر قادر ہے۔ کیا آپ مانتے ہیں کہ خدا اپنے جیسا دوسرا خدا پیدا کر سکتا ہے؟ سورۃ القصص کے اخیر میں ہے :’’کل شئی ھالک الاوجہ‘‘اس کی ذات کے سوا سب چیزیں فنا ہونے والی ہیں۔ کیاآپ اس فنا سے عرش وکرسی اور بہشت و دوزخ کو مستثنیٰ نہیں مانتے؟