ش: رباعی کے بعد اب خماسی کی جمع تکسیر کا حکم ذکر کر رہے ہیں فرماتے ہیں کہ خماسی کی جمع تکسیر ناپسندیدہ ہے جیسا کہ اس کی تصغیر ناپسندیدہ ہے یعنی عرب لوگ پسند نہیں ہاں اگر کوئی پوچھ لے تو پانچویں حر ف کے حذف کرنے کے ساتھ بناتے ہیں جیسے فرزدق سے فرازد۔
قولہ : ونحو تمر وحنظل وبطیخ۔۔۔
ش:یہاں سے ایسے الفاظ کو بیان کیا جارہا ہے جن میں یہ وھم پڑتا ہے کہ یہ جمع ہیں حالانکہ وہ جمع نہیں بلکہ یا تو اسم جنس ہیں یا اسم جمع۔
اسم جنس کی تعریف
جو اسم لفظ مفرد کے ساتھ قلیل وکثیر پر واقع ہو اور اس کے واحد پر تاء داخل کی جائے تاکہ اپنے جمع سے ممتاز ہوایسے اسم کو اسم جنس کہتے ہیں ۔
اسم جمع کی تعریف
اسم مفرد جب جمع کے معنی پر دلالت کرے تو وہ اسم جمع ہے جیسے قوم ،رھط وغیرہ۔
اسم جنس اور اسم جمع میں فرق
ان دونوں میں فرق یہ ہے کہ اسم جنس جو مجرد عن التاء ہو وہ واحد ،تثنیہ جمع سب پر دلالت کرتا ہے کیونکہ اسم جنس ماہیت کے لیے وضع کیا گیا ہے چاہے اس کے مشخصات قلیل ہوں یا کثیر جیسے تمر ایک ماہیت کے لیے وضع کیا گیا ہے اگر خارج میں اس کے مشخصات دو بھی ہوں تب بھی اس پر تمر کا اطلاق کیا جائے گا ۔
برخلاف اسم جمع کے ۔کیونکہ اس کی وضع فقط جمع کے لیے ہے گویا دونوں میں فرق من حیث المعنی ہے ۔
