آپ کابار بار ذکر آیا ہے، اس لیے ہم اس قصے کوذرا کھول کر بیان کرنا چاہتے ہیں۔
حضرت ابراہیم ؑکاقصہ تو آپ پہلے سن چکے ہیں۔ حضرت ابراہیم ؑ کے دوبیٹے بہت مشہور ہوئے ہیں۔ حضرت اسمٰعیل ؑاور حضرت اسحاق ؑ۔ حضرت اسمٰعیل مکہ مکرمہ میں ٹھہرے، جہاں حضرت ابراہیم ؑان کو ان کی والدہ کے ساتھ چھوڑ آئے تھے، جہاں ان کی اولاد خوب پھولی پھلی ، انہی میں ہمارے رسول پاک جناب محمدرسول اللہ ﷺ پیدا ہوئے۔ دوسرے بیٹے حضرت اسحاق ؑ شام کے ملک میں آباد ہوئے، ان کے بیٹے حضرت یعقوب ؑ تھے جن کادوسرا نام اسرائیل یعنی اللہ کابندہ تھا۔ان کی اولاد بنی اسرائیل کہلائی، یہ لوگ حضرت یوسف ؑکی وجہ سے مصر میں آباد ہوگئے تھے جہاں کاقصہ پہلے تحریر کردیا گیا ہے، جہاں وہ مصریوں کے چار سوسال تک غلام بنے رہے۔ مصر پر اس زمانے میں قبطیوں کی حکومت تھی، ان کابادشاہ فرعون کہلاتا تھا، یہ بنی اسرائیل پر طرح طرح کے ظلم کرتا تھا۔ اللہ تعالیٰ نے رحم فرمایا اور بنی اسرائیل کی ہدایت اور آزادی کے لیے حضرت موسیٰ ؑ کو پیدا کیا۔
مصر کے بادشاہ فرعون کو نجومیوں نے بتایا کہ بنی اسرائیل میں بہت جلد ایک لڑکا پیدا ہونے والا ہے جو تیری حکومت کو تباہ کر کے اپنی قوم کو آزاد کرلے گا۔ اس خبر سے وہ پریشان ہوگیا اور اس نے حکم دیا کہ اس قوم میں جولڑکا پیدا ہو اُسے ذبح کردیاجائے، مگر لڑکیاں زندہ رہنے دی جائیں۔
جس سال حضرت موسیٰ ؑپیدا ہوئے ان کی والدہ کو اس بات کا ہر وقت کھٹکالگارہتا تھا کہ کوئی دائی بادشاہ کو اس بات کی خبر نہ کردے، مگر اللہ نے ان کوتسلی دی کہ تم فکر نہ کرو۔ جب بھید کھل جانے کاخطرہ زیادہ ہوگیا تو انھوں نے اللہ کے حکم سے انھیں ایک صندوق میں بند کرکے دریا میں ڈال دیا۔ دریا کے دوسری طرف فرعون کے گھر والے آباد تھے۔ انھوں نے صندوق جو بہتے دیکھا تو اُٹھا کر گھر لے گئے۔ انھیں خبر نہ تھی کہ آگے چل کر یہی لڑکا ان کے رنج وغم کا سبب ہوگا۔ فرعون کی بیوی نے کہا:اسے قتل نہ کرو، یہ ہم سب کی آنکھوں کی ٹھنڈک ہے، ہمارے کام آئے گا اور ہم اسے اپنا بیٹا بنالیں گے۔
اب ان کے دودھ پلانے کی فکر ہوئی ،تو وہ کسی عورت کادودھ نہیں پیتے تھے۔ ان کی بہن جواس صندوق کے پیچھے لگی ہوئی تھیں اوریہ سب کچھ دیکھ رہی تھیں، انھوں نے کہا: میں ایک انا کاپتہ دیتی ہوں جو اس کو پال لے گی اور اچھی طرح دیکھ بھال کرلے گی اور انھوںنے حضرت موسیٰ ؑ کی ماں کا پتہ بتایا۔ اس طرح حضرت موسیٰ ؑ اپنی ماں کے پاس پہنچ گئے۔ اللہ تعالیٰ حضرت موسیٰ ؑکی ، ان کی قوم کے دشمن فرعون کے گھر میں پرورش کرتے رہے، یہاں تک کہ آپ جوان ہوگئے۔
ایک روز کاقصہ ہے کہ وہ صبح سویرے شہر آئے، اس وقت سب کے سب آرام سے سورہے تھے، انھوں نے اپنی قوم کے ایک آدمی کو دیکھا جسے ایک قبطی ماررہا تھا، کیوںکہ وہ اس سے بیگار میں کام لینا چاہتا تھا اور وہ انکار کررہا تھا۔ حضرت
