یہ خط اعظم گڑھ کے پتہ پر لکھتا ہوں۔ معلوم نہیں کہ آپ ابھی علی گڑھ ہی میں ہیں یا وہاں سے واپس آگئے۔ راغب اصفہانی نے مفردات میں لفظ نبی کی تشریح میں لکھا ہے کہ لفظ نبی کے دو معنی ہیں۔ خبر دینے والا اور بلند مقام پر کھڑا ہونے والا۔ اوّل الذکر نبی ہمزہ کے ساتھ اور دوسرا بغیر ہمزہ کے، اس ضمن میں راغب نے ایک حدیث بھی نقل کی ہے۔ یعنی حضور رسالت مآب(ﷺ) نے فرمایا کہ میں نبی بغیر ہمزہ کے ہوں۔ یہ حدیث صحاح ستہ میں ہے یا نہیں۳۶؎؟
قرآن شریف میں جن انبیاء کا ذکر ہے ان میں سے کون سے نبی باہمزہ ہیں اور کون سے بغیر ہمزہ؟ یا سب بغیر ہمزہ ہیں۳۷؎؟
یہ سوال بڑا اہم ہے۔ کیونکہ اگر قرآنی انبیاء یا حضور رسالت مآب نبی بغیر ہمزہ ہیں تو لفظ نبی کا انگریزی ترجمہ Prophet جس کے معنی خبر دینے والا کے ہیں۔ کیونکر درست ہوسکتا ہے؟ امید کہ آپ کا مزاج بخیروعافیت ہوگا۔ (مکاتیب اقبال ص۱۸۶، شیخ عطاء اﷲ ایم۔اے)
والسلام!
مخلص: محمد اقبال
۳…
بھوپال شیش محل، مورخہ ۱۹؍جولائی ۱۹۳۵ء
مخدوم ومکرم جناب قبلہ مولوی صاحب! السلام علیکم!
میں گلے کے برقی علاج کے لئے کچھ مدت کے لئے بھوپال میں مقیم ہوں۔ اس خط کا جواب یہیں مذکورہ بالا پتہ پر عنایت فرمائیے۔
۱… کیا فقہ اسلامی کی رو سے توہین رسول قابل تعذیر جرم ہے۔ (بے شبہ۔ ندوی) اگر ہے تو اس کی تعزیر کیا ہے؟ (تعزیر حسب رائے امام قید سے لے کر قتل تک۔ ندوی)
۲… اگر کوئی شخص جو اسلام کا مدعی ہے یہ کہے کہ مرزاغلام احمد قادیانی کو حضور رسالت مآب(ﷺ) پر جزوی فضیلت حاصل ہے۔ اس واسطے کہ مرزاقادیانی ایک زیادہ متمدن زمانہ میں پیدا ہوئے ہیں تو کیا ایسا شخص توہین رسول کے جرم کا مرتکب ہے؟ بالفاظ دیگر اگر توہین رسول جرم قابل تعزیر ہے تو عقیدہ مذکور توہین رسول کی حد میں آتا ہے یا نہیں۳۸؎؟
۳… اگر توہین رسول کی مثالیں کتب فقہ میں مذکور ہوں تو مہربانی فرماکر ان میں سے چند تحریر فرمائیے۔ کتاب کا حوالہ بقید صفحہ تحریر فرما کر ممنون فرمائیے۳۹؎۔