بعض جگہ جوتا چھپانے کی رسم نہیں، مگر اس کا انعام باقی ہے۔ کیا واہیات ہے؟ اس سے بدتر رسم چوتھی کھیلنا ہے جو بعض شہروں میں رائج ہے۔ اس میں جس درجہ بے حیائی وبے غیرتی ہوتی ہے اس کا کچھ پوچھنا نہیں، پھر جن کی عورتیں اس چوتھی کھیلنے میں شریک ہوتی ہیں ان کے شوہر باوجود اطلاع کے انتظام وانسداد نہ کرنے کی وجہ سے د۔ّیوث بنتے ہیں اور مشابہت کفار کی ان سب کے علاوہ ۔
۸۳۔ جب دولہا آتاہے تو وہاں کا نائی اس کے داہنے پیر کا انگوٹھا دھوکر اپنا حق لیتا ہے جو ایک روپیہ کے قریب ہوتا ہے اور باقی کمینوں کا خرچ گھر میں دیتے ہیں، یہ سب شگون التزامِ مالا یلزم ہے، ان سب مواقع میں نائی کا حق سب سے زیادہ سمجھا جاتاہے۔ یہ کفارِ ہند کی رسم کا اتباع ہے۔ ان کے رواج میں چوںکہ نائی کے اختیارات بہت وسیع ہیں اس لیے اس کی بڑی قدر ہے، بے علم مسلمانوں نے اختیارات تو سلب کرلیے، مگر تنخواہ وہی رکھی جو اکثر جگہ محض ناحق لینا دینا ہے اور جہاں کوئی شرعی تاویل بھی نہیں ہوسکتی۔
۸۴۔ دوچار دن کے بعد پھر دولہا والے دلہن کو لے جاتے ہیں، اس کو ’’بہوڑا‘‘ کہتے ہیں، اور اس میں وہی سب رسمیں ہوتی ہیں جو چوتھی میں ہوتی ہیں، جو مکروہات ومعاصی اس میں تھے وہی سب یہاں بھی سمجھ لیے جاویں۔
۸۵۔ اس کے بعد بہو کے باپ کے گھر سے کچھ عورتیں بہو کو لینے کے لیے آتی ہیں اور اپنے ساتھ کھجوریں لاتی ہیں، وہی التزامِ مالا یلزم ہے۔
۸۶۔ وہ کھجوریں ساری برادری میں تقسیم ہوتی ہیں، وہی رِیا ونمود۔
۸۷۔ پھر جب یہاں سے رخصت ہوتی ہے، تو نئی کھجوریں اس کے ساتھ کی جاتی ہیں وہی التزامِ مالا یلزم ہے۔
۸۸۔ اور وہ باپ کے گھر جاکر برادری میں تقسیم ہوتی ہیں، وہی فخرورِیا۔
۸۹۔ اس کے بعد اگر شبِ براء ت اور محر۔ّم ہو تو باپ کے گھر ہوگا، یہ پابندی کون سی وحی سے ثابت ہے۔ صرف وجہ اس کی ایک خیالِ جاہلیت ہے کہ محر۔ّم اور شبِ براء ت کو نَعُوْذُبِاللّٰہِ نامبارک سمجھتے ہیں، اس لیے دولہا کے گھر اس کا ہونا نازیبا جانتے ہیں۔
۹۰۔ اور رمضان بھی وہیں ہوگا، قریب عید سواری بھیج کر بہو کو بلاتے ہیں۔ غرض یہ کہ جو تہوار غم اور بھوک اور سوزش کے ہیں۔ محر۔ّم خود زمانہ حزن کا سمجھا جاتاہے، رمضان میں بھوک اور پیاس کا ہونا ظاہر ہے۔ شبِ براء ت کو عوام جلتا بلتا کہتے ہیں، غرض یہ سب باپ کے حصہ میں، اور عید جو خوشی اور شیرینی کا تہوار ہے وہ شوہر کے گھر ہونا چاہیے۔
۹۱۔ اور وہاں سے دوتین من جنس مثل سو۔ّیاں، چاول، آٹا و میوہ وغیرہ بھیجا جاتاہے اور دولہا دُلہن کا جوڑا مع کچھ نقدی گھی
