حرفِ آغاز
الحمد للہ وحدہ، والصلاۃ والسلام علی من لا نبی بعدہ۔
پیش نظر کتاب ’’نقوشِ سیرت‘‘ سیرتِ نبویہ علی صاحبہا الف الف سلام کی حیات، خدمات، مشن، کردار وپیغام کی نمایاں اور روشن وتابندہ جھلکیوں کو پیشِ نظر کرنے کی ایک محدود کوشش وکاوش ہے۔
مؤلف نے اپنی سعادتِ حیات باور کرکے اور اپنے لئے ذخیرۂ آخرت بنانے کے ارادہ سے سیرت کی اس مقدس ومبارک وادی میں قدم رکھا ہے، اور اشہبِ قلم کو مہمیز دی ہے، فتقبل اللّٰہ منہ قبولاً حسناً۔
اس کتاب میں کچھ ایسے موضوعات بھی ہیں جو بالعموم سیرت کی کتابوں میں ذکر نہیں کئے جاتے، اسوۂ رسول کے روشن عناوین کے ذیل میں سیرت کے سترہ نکات کو اختصار کے ساتھ سمیٹنے کی کوشش کی گئی ہے۔ اہانتِ رسول کی حالیہ دشمنانہ سرگرمیوں کے حوالہ سے ایک چشم کشا تحریر بھی شاملِ کتاب کی گئی ہے، سیرتِ رسول کے تربیتی پہلو پر خاص توجہ مرکوز کی گئی ہے، اس طرح اگر یہ کہا جائے کہ یہ کتاب سیرتِ نبویہ کے نمایاں نقوش کو کسی درجہ میں حاوی اور محیط ہوگئی ہے ، تو بے جا نہ ہوگا۔
خداوند قدوس اس کوشش کو قبول فرمائے، اور اسے راقم کی نجات ومغفرت اور استحقاق شفاعتِ نبوی کا وسیلہ وذریعہ بنائے، آمین۔
محمد اسجد قاسمی ندوی
خادم الحدیث جامعہ عربیہ امدادیہ مرادآباد
یکم رجب المرجب ۱۴۳۰ھ
۲۵؍جون ۲۰۰۹ء
،l،