منازل سلوک |
ہم نوٹ : |
اس وعظ کا تعارف احکامِ شریعت پر محبت کے ساتھ عمل کرنے کا نام تصوف ہے۔ جو تصوف خلافِ شریعت و سنت ہو وہ اللہ کے یہاں مقبول نہیں بلکہ مردود ہے۔ انسان جس طرح دنیاوی ترقی کی منازل طے کرنے کے لیے ہر دم کمر بستہ رہتا ہے، آگے سے آگے بڑھنے کی دُھن میں جان، مال اور وقت سب جھونک دیتا ہے، اللہ کی راہ میں اس تن دہی سے ترقی کی منازل طے کرنے کا شوق ولگن نہیں رکھتا۔ اس کا سبب اللہ و رسول کی معرفت و محبت اور فکرِ آخرت میں کمی ہے۔ شیخ العرب والعجم عارف باللہ مجدد زمانہ حضرت اقدس مولانا شاہ حکیم محمد اختر صاحب رحمۃ اللہ علیہ کا یہ وعظ ’’منازلِ سلوک‘‘ اس محبت و فکر کو بڑھانے میں نہایت معاون و مددگار ثابت ہوتا ہے۔ اس وعظ میں حضرت والا نے جہاں تصوف کے متعدد مسائل کو قرآن و حدیث سے مدلل کیا ہے وہیں اللہ کا راستہ طے کرنے کے لیے جن احکامات پر عمل کرنا ضروری ہوتا ہے ان کی نشاندہی بھی کی ہے۔