دوسرا واقعہ حضرت نانوتوی کا لکھا ہے کہ اپنے صاحب زادے کے کپڑے کی گٹھڑی منگا کر دیکھی تو اس میں کپڑے کسی قدر تکلف کے تھے اور گٹھڑی جام دانی کی تھی۔ حضرت ان کو دیکھ کر بہت نفرت کے ساتھ سب کو پھینک رہے تھے اور زجر فرماتے تھے۔ حضرت بہت بڑے زاہد تھے۔ اس کے بعد تیسرا واقعہ حضرت گنگوہی کا یہ تحریر فرمایا کہ گنگوہ میں خانقاہ کی مسجد کو لوگوں نے تیار کرنا چاہا، حضرت مولانا گنگوہی ؒ نے لوگوں سے صاف کہہ دیا کہ بھائی! میرے بھروسے کوئی کام نہ کرنا کہ میں چندہ وصول کرانے میں سعی کروں گا۔ (طویل قصہ ہے)
۱۲۔ متعلقہ صفحہ ۱۱: حکایت: ۳ ایک صالح ذی علم نے اپنی حالتِ باطنیہ لکھی تھی۔ یہاں سے اس کی تحقیق کی گئی تھی، وہ ذیل میں منقول ہے۔
سوال: اب وجہ اس کی عرض کرتا ہوں کہ بیعت ہونے کا خیال مجھ کو کیوں ہوا، اور حضور کی طرف کیوں رجوع کیا۔ ۱۔ بیعت کا شوق صرف مطالعۂ کتبِ تصوف سے اور حضور کی جانب رجوع اس لیے کہ ہمارے نانا صاحبان … لودھیانہ والوں سے حضور کے اعتقادات ملتے جلتے تھے، اس سے یہ غرض نہیں کہ ہمارے نانا یا اور کوئی اپنے دادا وغیرہ علما کے اعتقادات گو خراب ہی ہوں ان کو بلا وجہ ترجیح دی جاوے، اصل غرض یہ ہے کہ حضور کے اور بندے کے اعتقادات بالکل ایک ہیں، اور اگر مولوی صاحبان لودھیانوی اور حضور کے درمیان اگر کسی فروعات میں اختلاف بھی ہو تو اس میں بھی جناب کی طرف رجوع کرتا ہوں۔ ۲۔ اور حضور کی تصنیف چند کتابیں زیرِ مطالعہ رہی ہیں، جن میں سے ’’بہشتی زیور‘‘ تو حرزِ جان ہے … کچھ عرصے کے بعد خواب دیکھتا ہوں کہ کلمہ شریف لا إلہ إلا اللّٰہ محمد رسول اللّٰہ پڑھتا ہوں، لیکن محمد رسول اللّٰہ کی جگہ … کا نام لیتا ہوں، اتنے میں دل کے اندر خیال پیدا ہوا کہ تجھ سے غلطی ہوئی کلمہ شریف کے پڑھنے میں، اس کو صحیح پڑھنا چاہیے اس خیال سے دوبارہ کلمہ شریف پڑھتا ہوں، دل پر تو یہ ہے کہ صحیح پڑھا جاوے، لیکن زبان سے بے ساختہ بجائے رسول اللہ ﷺ کے نام کے … نکل جاتا ہے، حالاں کہ مجھ کو اس بات کا علم ہے کہ اس طرح درست نہیں، لیکن بے اختیار زبان سے یہی کلمہ نکلتا ہے، دو تین بار جب یہی صورت ہوئی تو حضور کو اپنے سامنے دیکھتا ہوں اور بھی چند شخص حضور کے پاس تھے، لیکن اتنے میں میری یہ حالت ہوگئی کہ کھڑا کھڑا بوجہ اس کے کہ رقت طاری ہوگئی زمین پر گر گیا اور نہایت زور سے ایک چیخ ماری اور مجھ کو معلوم ہوتا تھا کہ میرے اندر کوئی طاقت باقی نہیں رہی اتنے میں بندہ خواب سے
