جام نمبر ۱۶: مجھ کو متعدد سفروں میں مولانا کی معیت کا اتفاق رہا، میں بکثرت دیکھتا تھا کہ محنت مشقت کا کام کرنے میں، بوجھ اٹھانے میں نہ کسی رفیق کا انتظار فرماتے تھے اور نہ کسی اجیر کا، ہر کام اپنے ہاتھ سے کرنے کو آمادہ ہوجاتے تھے گو خدام اس کی تکمیل نہ ہونے دیتے تھے، مگر بعض اوقات خدام سے سبقت فرما جاتے تھے۔
فائدہ: اپنا یار فقا کا کام اپنے ہاتھ سے کرنا عین اتباعِ سنت ہے کہ حضور اقدس ﷺ اپنے ہم راہیوں سے ممتاز ہوکر نہ رہتے تھے، خصوصاً سفر میں اور اکثر کام اپنے ہاتھ سے کرلیتے تھے۔
جام نمبر ۱۷: ایک بار میں سہارن پور غالباً جلسۂ مدرسہ میں حاضر ہوا، بعد جلسہ کے ایک گاؤں والوں نے (جس کا نام غالباً شیخ پورہ ہے) مولانا کو مع دوسرے خدام اور احقر کے مدعو کیا، اور اس سے دوسرے دن ایک تاجر چاول مقیم سہارن پور نے ہم سب کی مع بعض مہمانان مقیمین دعوت کی، مولانا نے وعدہ فرمالیا کہ گاؤں سے صبح کو واپس آکر دوپہر کا کھانا تمہارے یہاں کھالیں گے، شام کو گاؤں گئے اور شب کو وہاں مقیم رہے پھر صبح کو عین ایسے وقت کہ خوب زور سے بارش ہو رہی تھی اسٹیشن پٹری پر سوار ہوئے، اہلِ موضع ایسے وقت کے سفر کو گوارا نہ کرتے تھے اور قیام پر مصر تھے، لیکن چوں کہ ان سوداگر صاحب سے وعدہ تھا اس لیے بھیگتے ہوئے ریل پر پہنچے اور سہارن پور اترے، گاڑی میں بیٹھے ہوئے مدرسہ کو آرہے تھے کہ راستہ میں وہ سوداگر صاحب ملے، مولانا نے گاڑی ٹھیرا کر یا آہستہ کراکر (یاد نہیں) ان کو اپنی واپسی کی اطلاع کی کہ ہم لوگ اپنے وعدے پر آگئے ہیں تو آپ کیا مزے کا جواب دیتے ہیں کہ مجھ کو امید واپسی کی نہ تھی اس لیے میں نے کچھ سامان نہیں کیا۔
اب کل صبح کی دعوت ہے، اس وقت مولانا کا حلم اور میرا غصہ دیکھنے کے قابل تھا، مگر بوجہ ادب کے غصہ ظاہر نہ کرسکتا تھا اور مولانا نے منظور فرمالیا اور کھڑے چڑھے سب مہمانوں کے کھانے کا انتظام فرمانا پڑا۔ اگلے دن کی دعوت سے میں نے
