یہ سلسلہ شروع ہوا اور ہر مسافر نے بیٹھے بیٹھے ‘لیٹے لیٹے اپنی جگہ اس سے فائدہ اٹھایا‘ مستورات بھی مستفید ہوئیں جہاز کے دن کامل فراغت و فرصت کے ہیں‘ زندگی کی سب سے بڑی مصروفیت نقل و حرکت تھی‘ مکان ‘ دکان‘ کار خانہ‘ دفتر‘ سڑک‘ باغ‘ محلہ‘ شہر‘ یہاں کچھ نہیں ‘ نیچے نیلا سمندر‘ اوپر نیلا آسمان‘ ان دونوں کے درمیان لکڑی کے ایک تختہ پر انسانوں کی یہ بستی‘ کوئی کہیں آنا جانا چاہے بھی تو کہاں جائے‘ گھوم پھر کر وہی ایک محلہ ‘ وہی لکڑی اور لوہے کا چھوٹا سا تیرتا ہوا گائوں‘ نقل وحرکت کی جو کچھ عمر بھر کی عادت اور ہوس تھی چکروں اور دردسر نے اس کو بھی پابند کر دیا۔ گویا سارے شوقین وبد شوق طالب علم امتحان سے پہلے مطالعہ کے ایک کمرے میں بند کردیئے گئے۔ حیف ہے اگر اب بھی امتحان کی تیاری نہ کریں! خیال ہوا کہ جماعتوں کے گشت‘ انفرادی تبلیغ اور تعلیم و تلقین کا اس سے بہتر وقت اور مقام نہیں ہو سکتا۔ ناشتہ اور چائے کے بعد مسجد میں تعلیم کا اعلان ہوا اور عصر کی بعد گشت کا نظام بنا‘ یہاں بھی وہی انکشاف جو پہلے ہوا تھا۔ دین کے مبادی وارکان سے ناواقفیت‘ حج کے حقوق وآداب سے غفلت‘ آخر مسلمانوں کی یہ آبادی سمندر کے کسی جزیرے سے تو نہیں آئی۔ اسی ہندوستان یا پاکستان سے تو آئی ہے‘ جہاں جہالت وغفلت عام ہے۔ حجاج مسلمانوں کی عام آبادی ہی کا جز ہیں‘ ان سے کسی چیز میں ممتاز اور عام حالات سے مستثنیٰ کس طرح ہوسکتے ہیں خصوصاً جب کہ ان کا بڑا حصہ عملی و دماغی حیثیت سے پسماندہ اور غیر تعلیم یا فتہ طبقہ سے تعلق رکھتا ہے۔
حج کو جہاد کی ایک قسم کہا گیا ہے اور افضل قسم ’’اَفْضَلُ الْجِھَادِ حَجٌّ مَبْرُوْرٌ‘‘ حضرت عمرt نے ارشاد فرمایا: ((شد الرحال فی الحج فانہ احد الجھادین)) ’’حج میں اپنے کجاوے مضبوط کسو‘ اس لیے کہ وہ بھی ایک جہاد ہے‘‘ جہاز کا اس سفر جہاد کا ایک مستقل شعبہ ہے۔ دردسر‘ چکر‘ امتلائی کیفیت اور اس میں نمازوں کی ادائیگی اچھا خاصا جہاد ہے اس جہاد میں کا میابی بغیر دینی تربیت اور پختہ عزیمت کے ممکن نہیں‘ جو لوگ بغیر کسی عذر کے بھی نماز کے پابند نہیں ان سے ایسی آزمائشوں کے ساتھ نماز وجماعت کا اہتمام بہت مشکل ہے اس کے لیے بڑی ایمانی قوت کی ضرورت ہے‘ اور اس ایمانی قوت کے پیدا کر نے کا ہمارے موجودہ نظام سفر میں کوئی اہتمام نہیں‘ الحمد للہ وعظ و تبلیغ سے کسی حد تک نفع ہوا اور بہت سے لوگوں نے نمازوں کا اہتمام رکھا جو لوگ درد سر اور متلائی کیفیت میں مبتلا تھے اور نقل وحرکت سے معذور تھے‘ وہ اپنی اپنی جگہ پڑے پڑے بھی اللہ کا ذکر زبان اور دل سے کرتے رہے۔
حج کے دو مستقل شعبے ہیں‘ ایک ضوابط و قوانین کا جس میں مومن کی اطاعت وانقیاد کا امتحان اور مظاہرہ ہے‘ ایک محبت وعشق کا جس میں اس کی عاشقانہ کیفیت اور والہانہ محبت کا ظہور مطلوب ہے اور سچ پوچھئے تو حج کی روح اور حضرت ابراہیم u کی میراث یہی عشق و محبت ہے۔ حج میں انہیں دبی ہوئی چنگاریوں کا ابھارنا اور اسی محبت کی تربیت اور ترقی مقصود ہے۔ بعض طبیعتوں کے خمیر میں عشق و محبت داخل ہوتی ہے ان کو حج سے فطری مناسبت ہوتی ہے۔ اس کی سب مشکلات ان کے لیے آسان اور ان کے سب مناسک اور ارکان ان کی روح کی غذا اور ان کے درد کی دوا ہوتے ہیں۔ اگر یہ محبت وعشق فطری نہیں اور طبیعت خشک اور قانونی محض
