اس یقین کے ساتھ دعا کیجئے کہ اللہ تعالیٰ سننے والے قبول کرنے والے ہیں ان کے خزانے میں سب کچھ ہے وہ سب کر یموں سے بڑے کریم ہیں وہ مجھے اپنے کرم سے محروم نہیں رکھیں گے اور میری دعا ضرور قبول فرمائیں گے۔
سعی کے بعد دورکعت نماز پڑھئے اور اس کے بعد سر کے بال منڈ وائیے یا کتروایئے
سعی کے سات پھیرے کر کے آپ کی سعی بھی پوری ہوگئی اب آپ مطاف میں آکر کسی بھی جگہ دو رکعت نماز پڑھیں‘ رسول اللہ e ایسا ہی کرتے تھے اس کے بعد آپ سر کے بال منڈوا دیجئے یا کتروا دیجئے۔
لیجئے عمرہ پورا ہو گیا اور آپ کا احرام ختم ہوگیا اب احرام کی کوئی پابندی نہیں رہی‘ نہایئے دھوئیے سلے کپڑے پہنئے خوشبولگائیے اب آپ کے لیے وہ سب چیزیں جائز ہو گئیں جو احرام کی وجہ سے ناجائز ہو گئی تھیں۔
حج سے پہلے مکہ معظمہ کے زمانۂ قیام کے مشاغل
اب انشاء اللہ حج کا احرام آپ آٹھویں ذی الحجہ کو باندھیں گے اس وقت تک آپ مکہ معظمہ میں بغیر احرام کے رہیں گے اس مدت میں ہر منٹ اور ہر سیکنڈ کو غنیمت سمجھئے ‘ فضول اور لایعنی مشاغل میں اپنے وقت کا کوئی حصہ نہ گزاریئے۔ مکہ معظمہ کے اس زمانہ قیام میں جہاں تک ہوسکے مسجد حرام ہی میں وقت زیادہ گزارئیے‘ نامعلوم پھر کبھی عمر بھر یہ سعادت میسر آئے نہ آئے‘ کثرت سے طواف کیجئے‘ خوب نفل نمازیں پڑھئے‘ ذکر وتلاوت کے لیے بھی اس سے بہتر کونسی جگہ ہو سکتی ہے‘ اور اگر کسی وقت وہاں بیٹھنا بھی ہو تو محبت اور عظمت کے ساتھ بیت اللہ شریف کو بار بار دیکھئے‘ رب العالمین کی یہ وہ تجلی گاہ ہے جس کی طرف نظر کرنا بھی عبادت ہے اس کی عظمت اور رفعت کا اندازہ بس اسی سے کیجئے کہ خاتم الانبیاء والمرسلین سید الاولین والآخرین حضرت محمد رسول اللہ e بھی اس کا طواف کرتے تھے اور اسی کی طرف منہ کر کے نماز پڑھنے کا آپ کو حکم تھا‘ اور اب قیامت تک کے لیے وہی اور صرف وہی خدا پر ستوں کے لیے واحد قبلہ ہے۔ اس زمانہ میں تبلیغ وتعلیم کے کام میں برابر حصہ لیتے رہیے‘ دین کی تبلیغ و تعلیم کا سلسلہ اسی مسجد حرام سے اور اسی مقدس شہر سے شروع ہوا تھا‘ اگر آپ کی کوشش اور تعاون سے یہاں پھر وہی تبلیغی فضا قائم ہو جائے تو یقینا آپ کا یہ عمل اللہ کے نزدیک بہت محبوب اور بڑا وزنی ہوگا۔
---
آٹھویں ذی الحجہ کو حج کا احرام اور منیٰ کو روانگی
حج کا احرام آپ اگرچہ آٹھویں ذی الحجہ سے پہلے بھی باندھ سکتے ہیں لیکن سہولت آپ کے لیے اسی میں ہے کہ آٹھویں ہی کی صبح کو باندھیں جہاز میں احرام باندھنے سے پہلے آپ نے جس طرح غسل کیا تھااسی طرح اب بھی پہلے غسل کیجئے اور کسی وجہ سے غسل نہ ہو سکے تو صرف وضوہی کر کے ایک لنگی باندھ لیجئے اور ایک چادر اوڑھ لیجئے‘ اس کے بعد مسجد حرام ہی میں پہلے دوگانہ احرام پڑھئے (اور جیسا
