ماہنامہ انوار مدینہ لاہور ستمبر 2017 |
اكستان |
 |
( سلسلہ تقاریر نمبر٨ ) ''خانقاہِ حامدیہ'' کی جانب سے اَنوارِ مدینہ میں شیخ الاسلام حضرت اقدس مولانا سیّد حسین احمد مد نی قدس سرہ العزیز کی تقاریر شائع کرنے کا اہتمام کیا جا رہا ہے حضرتکے متوسلین و خدام سے اِلتماس ہے کہ اگر اُن کے پاس حضرت کی تقاریر ہوں تواِدارہ کو اِرسال فرما کر عندالناس مشکور اور عنداللہ ماجور ہوں۔(اِدارہ)عید ، مستحباتِ عید ، تعلیم ِدین اور مدارس کی اہمیت ( شیخ الاسلام حضرت مولانا سیّد حسین احمد صاحب مدنی ) جمع کردہ : مولانا رشید الدین صاحب حمیدی شیخ الاسلام حضرت مولانا سیّد حسین احمد صاحب مدنی قدس اللہ سرہ العزیز نے ١٣ مئی ١٩٥٦ء کو ایک جلسۂ عید میں جو بانس کنڈی آسام کے مدرسہ میں منعقد ہوا تھا، تقریر کرتے ہوئے فرمایا :نَحْمَدُہ وَنُصَلِّیْ عَلٰی رَسُوْلِہِ الْکَرِیْمِ اَمَّابَعَدْ ! آج کے دن عیدمبارک ہے حدیث شریف میں آیا ہے کہ رمضان کی ہر رات میں ایسے بہت سے دوزخیوں کو کہ جن کے اُوپر دوزخ واجب ہوچکی تھی نجات دی جاتی ہے لیکن عید کی رات ایسی مبارک رات ہے کہ اِس رات میں اللہ تعالیٰ پورے رمضان میں جتنے دوزخیوں کو نجات دیتے ہیں اُن سب کے برابر اِس عید کی رات میں نجات دیتے ہیں ایسی مبارک رات آج ختم ہوگئی، آج کے مبارک دن میں ہر گلی اور کوچہ میں فرشتے گھو متے پھرتے اور روزہ داروں کے لیے دعا کرتے ہیں۔ مسلمان کے دو تہوار ہیں ایک ''عید الفطر ''اور دوسرے ''عید الاضحی'' فجر کے بعد غسل کرکے نیایا اچھا کپڑا پہن کر خوشبو لگا کر تکبیر پڑھتے ہوئے عیدگاہ جانا چاہیے، یہ نماز واجب ہے بغیر عذر کے چھوڑنا گناہ ہے۔