اوہدے سخت عذاب دا خوف رکھیں لکے ظاہری چھڈ عصیان پیارے
ناامید نارحمتوں کدی ہوئیں عفو مغفرت دا رکھیں دھیان پیارے
سورج لہندیوں چڑھے نا جدوں تائیں بوہا توبہ دا کھلا ہرآن پیارے
کوئی عمل ہووے نیت پاک رکھیں کریں نال ایمان احسان پیارے
لیکے آدموں ؑ عرب دے نبیؐ تائیں سبھاں پیاریاں نوں سچے جان پیارے
اﷲ ولوں توریت زبور آئی حق من انجیل فرقان پیارے
بندے اﷲ دے پاک فرشتیاں تے رکھیں صدق دے نال ایمان پیارے
رکھ پاک یقین قیامت اوتے عمل سب ایس بن رائگان پیارے
نیکی بدی تقدیر خدائی دی اے ایس وچ کجھ شک نہ آن پیارے
آؤن قبر دے وچ نکیر منکر ہوندا بندیاں دا امتحان پیارے
عیسیٰ پھیر قیامتوں اگے آؤ اس گھڑی دا ایہ نشان پیارے
من لین یہود عیسائی اوہنوں کڈھے کانے دجال دی جان پیارے
عیسیٰ مقتدی مہدی امام ہووے ایڈی ایس امت دی ہے شان پیارے
پہلاں ہور بی کئی دجال آؤں دیکھ دیکھ نہ ہوئیں حیران پیارے
دنیا وچ جان بدعتی کرن جھگڑے تکڑا پھڑیں حدیث قرآن پیارے
جدوں نبی دا قول صحیح لبھے کریں اس تے جان قربان پیارے
نئیں اوہ مؤمن جیہڑا جاندا ہے میرے سامنے مال تے جان پیارے
اکھاں دلدیاں دے اگے سدا رکھیں نبی صاحب دا ایہہ فرمان پیارے
پچھیں مسئلہ دین دا عالماں توں جیہڑی گل وچ ہوویں انجان پیارے
نبی باج نہ کسی دی ہور منیں ٹکڑے ہون بھاویں استخوان پیارے
ابوبکرؓ تے عمرؓ عثمانؓ حیدرؓ جانیں دین دے چار ارکان پیارے
بڑے مجتہد دین دے وچ مالکؓ احمدؓ شافعیؓ ہور نعمانؓ پیارے
اوہناں باجھ بی مجتہد بہت ہوئے سمجھ دین دی کیتی آسان پیارے
سبھاں دین وچ سعی مشکور کیتی حق اہناں دے سنگ رضوان پیارے
