دال دولت عرفان قرآن والی لبھے راہ حدیث والیاں توں
تن قرن دسے نبی خیر والے خیر ملے اوہناں مگر چلّیاں توں
اﷲ پاک جے آپ ناں کرے راکھی کون بچے شیطان دے ہلیاں توں
سدا اﷲ دا فضل توں منگ سعدی دور رکھے اوہ راہاں کولیاں توں
ذال ذرا انصاف ہن منصفاں نوں دینا چاہئے رب دا پاس کر کے
نالے مہد اے آپ امام بن دا ڈبا حرص وانگوں سورداس کر کے
اک مغل بچیا عیسیٰ بنن لگا دیکھو دین دا ستیاناس کر کے
نبی اپنے آپ نوں جاندا اے جھوٹھے وحی الہام دا پاس کر کے
رے راز نیاز اس گال دا ہن اصل اصل میں کھول سناؤندا ہاں
عیسیٰ مر گیا آکھدا قادیانی ایس کوڑ دی وجہ جتاؤندا ہاں
ایویں لکھیا اے بڈھے نیچری نے اؤ اوہدی تفسیر دکھاؤندا ہاں
مرزا دیکھ حدیث نزول والی لگا کہن ہن میں اوہدی تھاؤندا ہاں
زے زور لا کے کوشش مکر والی عیسیٰ مارن دے وچہ لادتی
استعارے سب لفظ بنا دتے مورکھ عاماں دی روح پرچار دتی
الو پھیر مڑ مگر تقلید لگے جو کجھ لبھی سی عقل گواء دتی
من لیا معصوم اک کادیانی انھی امت مرحومہ بنا دتی
سین سنگ نہ آوندی جنھاں نوں موہوں آکھ دے چکدے مول نائیں
ظاہر کہن پیغمبری ختم ہوئی دلوں مندے ایہہ مجہول نائیں
مرزا نبی اے وحی الہام دلوں منن صاف تے کہن فضول نائیں
مغز پھٹیا اے عیسیٰ منن خاطر سچا علم نکات دا دھول نائیں
شین شور پایا ابن ہودنے بی اگے وچہ دمشق دے پیاریا جی
اتھادیاں چوں بڑا زاہدا آہا روپ عیسیٰ دا اوہنے بی دھاریا جی
شیخ ابن تیمیہ نے رحمہ اﷲ اوہدا جھوٹھ فریب نتاریا جی
کادیانی دی گل کجھ نویں نائیں دیکھ دیکھ کے جال پساریا جی
