ماہنامہ انوار مدینہ لاہور مارچ 2013 |
اكستان |
|
٩ فروری بروز ہفتہ بعد نمازِ عشاء شیخ الحدیث حضرت مولانا سیّد محمود میاں صاحب جامعہ جدید کے فاضل مولانا طاہر صاحب کی دعوت پر پتوکی تشریف لے گئے جہاں آپ نے بعد نمازِ عشاء ختم ِ نبوت کے موضوع پر بیان فرمایا۔ ١٢ فروری بروز منگل حضرت صاحب حضرت مولانا محمد قاسم صاحب دین پوری مدظلہم کے داماد اَور بانجھے مولانا عبدالمجید صاحب دین پوری شہید کی تعزیت کے لیے جامعہ سے دن کے گیارہ بجے خانپور کے لیے روانہ ہوئے، رات نو بجے کے قریب ہم خانپور پہنچے ۔ رات کا قیام حضرت درخواستی صاحب کے داماد مولانا عبدالسمیع صاحب مدظلہ کے گھر پر ہوا، صبح نماز کے بعد حضرت صاحب ،حضرت مولانا قاسم صاحب سے تعزیت کے لیے اُن کے گھر تشریف لے گئے اَور تعزیت کی۔ بعد اَزاں ناشتہ سے فراغت کے بعد حضرت مولانا عبدالستار صاحب تونسوی کی تعزیت کے لیے تونسہ شریف کے لیے روانہ ہوئے۔ راستے میں لب ِ سڑک جامعہ حسینیہ کے ذمہ داران کے اِصرار کی وجہ سے کچھ دیر کے لیے ٹھہرے اَور اُن حضرات کی خواہش پر حضرت صاحب نے اِسلام میں صفائی کی اِہمیت کے موضوع پر نہایت جامع بیان اِرشاد فرمایا۔ عصر کے قریب ہم تونسہ شریف پہنچ گئے تونسہ شریف میں حضرت تونسوی کے دونوں بیٹے اُس وقت گھر پر موجود نہیں تھے۔ حضرت صاحب نے حضرت تونسوی کے دونوں بیٹوں کے غیر موجود گی میں اُن کے پوتے سے تعزیت کی ،بعد اَزاں تعزیت کے بعد ہم قصبہ ''دہوا'' کے لیے روانہ ہوئے، ہمارے جامعہ جدید کے دَورہ حدیث کے طالب علم بھائی محبوب صاحب نے اَپنے قصبہ میں بعد نمازِ عشاء حضرت صاحب کا بیان رکھا تھا جہاں حضرت صاحب نے یہاں کی جامع مسجد میں اِسلام میں سیاسیات کی اِہمیت اَور مقاصد پر نہایت پر اَثر بیان اِرشاد فرمایا۔ اَگلی صبح ناشتہ سے فارغ ہو کر اہل ِ قصبہ کی خواہش پر مستورات میں بیان فرمایا ،وقت کی کمی کی وجہ سے حضرت صاحب نے اہل ِ قصبہ سے اِجازت چاہی اَور ٹانک ڈیرہ اِسماعیل خان کے لیے روانہ ہوئے چونکہ ٹانک میں اَحقر کے چچا کی تعزیت کر نی تھی۔