تحفہ تراویح |
سم اللہ |
|
استاذ الاساتذہ صدر القراء قاری رضوان نسیم صاحب مد ظلہٗ جامعہ مظاہر العلوم سہارن پور (یوپی) عزیز گرامی مولانا عبد الرحیم صاحب سلمہ اللہ الرحیم السلام علیکم ورحمۃ اللہ وبرکاتہ آپ کی تالیف ’’تحفۂ تراویح‘‘ایک انوکھا تحفہ بن کر پہونچا ،یہ بہت سے ان لوگوں کیلئے نعمتِ غیر مترقبہ ہے جو قرآن کریم کے صرف الفاظ پڑھ یا سن لیتے ہیں لیکن اس کے معانی ومفاہیم اور کلام الٰہی کی روح سے ناواقف رہتے ہیں ،بے شک قرآن کریم کی محض تلاوت بھی بڑے ثواب اور خیر وبرکت کا ذریعہ ہے لیکن اس کے معانی ومطالب سمجھنا بھی بے حد ضروری ہے ،رمضان المبارک میں مسلمان تراویح میں قرآن کریم سننے کا بڑے شوق وذوق سے اہتمام کرتے ہیں لیکن ان میں اکثریت اس کے معنی نہ سمجھنے کی وجہ سے پورے طور پر لطف اندو ز نہیں ہوتی ، آپ نے یہ کتاب لکھ کر بہت عظیم کارنامہ انجام دیا ، اس کی بڑی ضرورت تھی اب حفاظ کرام کیلئے یہ کام بڑا آسان ہو گیا ہے کہ وہ ہرروز تراویح کے بعد مقتدیوں کو اس کتاب سے وہ حصہ سنا دیا کریں جو اس دن تراویح میں تلاوت کیا ہے اس سے نہ صرف ان کی دینی معلومات میں اضافہ ہوگا بلکہ ان کے دلوں میں قرآن کی جو عظمت ومحبت ہے اسمیں بھی انشاء اللہ زیادتی ہوگی ،یہ ایک اہم نازک اور انتہائی ضروری کام تھا جو رحیم نے اپنے بندہ سے لیا میں آپ کو اور آپ کے مربی عزیز مفتی عبد اللہ صاحب کو اس مبارک کام پر مبارک باد پیش کرتا ہوں ، اور دعاء کرتا ہوں کہ کریم آقا آپ کو مزید ہمت وتوفیق سے نوازے علمی ، عملی اور دینی ترقیات سے سرفراز فرمائے ، اور صحت وعافیت کے ساتھ آپ کی عمر دراز ہو ۔ فقط نوٹ :۔ طبیعت چاہتی ہے کہ آئندہ اس کی کتابت ،طباعت اور تصحیح اس کے شایان شان ہو ۔ دعاء گو ودعاجو محمد رضوان