تحفہ تراویح |
سم اللہ |
تقریظ از حضرت مولانا ذو الفقار احمد صاحب مدظلہ العالی استاذ حدیث وتفسیر وصدر مدرس دارالعلوم فلاح دارین ترکیسر قرآن پاک کی بہت سی خصوصیات ہیں ان میں سے ایک خصوصیت یہ ہیکہ رمضان شریف کے پورے مہینے تراویح کی نماز میں اس کو سنایا جاتا ہے ، اور نمازی اس کو قیام کی حالت میں انتہائی توجہ اور تواضع کے ساتھ سنتے ہیں اور اس کے سماع کے فیض سے روحانی فائدہ حاصل کرتے ہیں۔ لیکن قرآن مجید انتہائی فصیح وبلیغ عربی زبان میں ہے جن کی زبان عربی نہیں ہے یا وہ عربی پڑھے لکھے نہیں ان کو قرآن میں مذکور احکام وہدایات قصص وواقعات اور انبیاء علیھم السلام کی جد وجہد اور حالات کا پتہ نہیں چلتا ۔ بہت عرصہ سے میری خواہش تھی کہ روزانہ تراویح میں جتنا قرآن پڑھا جاتا ہے تراویح کے بعد ۱۰؍ منٹ میں اس کا انتہائی مختصر انداز میں خلاصہ بیان کر دیا جائے تو لوگوں کو فائدہ ہوگا ، اور ان کو ان مضامین سے واقفیت ہو جایاکریگی جو اس دن پڑھے جانے والے پارے میں مذکورہوئے ہیں ،یا کوئی ایسی تفسیر تیار ہوجائے جسمیں اختصار کے ساتھ روزانہ پڑھے جانے والے حصے کی تفسیرمختصرا تحریر کی گئی ہو طلباء سے اس ضرورت کا اظہار وقتا فوقتا کیا جاتا رہا ،الحمدللہ عزیز القدر مولوی عبد الرحیم فلاحی ؔمستند مدرس اشاعت العلوم اکل کوا نے اس عظیم کام کو رمضان شریف کے اوقات میں جد وجہد کر کے پورا کیا جو الحمدللہ ایک انتہائی مختصر تفسیر ہے جس کو روزانہ تراویح کے بعد تھوڑے سے وقت میں روزانہ پڑھے جانے والے قرآن پاک کی مقدار کے حساب سے سنایا جا سکتا ہے عزیز موصوف نے مسلم عوام کیلئے یہ عظیم تحفہ پیش کیا ہے اور نام بھی تحفۂ تراویح رکھا ہے اللہ تعالی اس تحفہ کو قبول فرمائے اور قرآن کے مضامین سے واقفیت کا ذریعہ بنائے اور عزیز موصوف کیلئے ذخیرۂ آخرت ثابت ہو اس سلسلہ میںعزیز القدر مولانا غلام محمد وستانوی فلاحی مہتمم اشاعت العلوم اکل کوا اور رکن شوریٰ دارالعلوم دیوبند بھی مبارک باد کے مستحق ہیں کہ موصوف نے طباعت کے سلسلہ میں مرتب کی حوصلہ افزائی فرمائی اللہ تعالیٰ دونوں حضرات کی مساعی جمیلہ کو قبول فرمائے آمین ۔ خاکسار ذوالفقار احمد غفرلہ (۲۳؍ستمبر ۲۰۰۰ ء)