ماہنامہ انوار مدینہ لاہور جنوری 2017 |
اكستان |
|
علمی مضامین سلسلہ نمبر١٤ قسط : ١ ''خانقاہِ حامدیہ''نزد جامعہ مدنیہ جدید رائیونڈ روڈ لاہورکی جانب سے محدث ، فقیہ، مؤرخ، مجاہد فی سبیل اللہ،مؤلف کتب کثیرہ شیخ الحدیث حضرت اَقدس مولانا سیّد محمد میاں صاحب رحمة اللہ علیہ کے بعض اہم مضامین جو تاحال طبع نہیں ہوسکے اُنہیں سلسلہ وار شائع کرنے کا اہتمام کیا گیا ہے جبکہ اُن کی نوع بنوع خصوصیات اِس بات کی متقاضی ہیں کہ اِفادۂ عام کی خاطر اُن کو شائع کردیا جائے۔ اِسی سلسلہ میں بعض وہ مضامین بھی شائع کیے جائیں گے جو بعض جرا ئد و اَخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ)حیاتِ مسلم پیدائش سے وفات تک ،اسلامی تقریبات و تعلیمات، سنن مستحبا ت بدعات و مکروہات ( شیخ الحدیث حضرت مولانا سیّد محمد میاں صاحب ) بِسْمِ اللّٰہِ الرَّحْمٰنِ الرَّحِیْمِ ( اَللّٰہُ وَلِیُّ الَّذِیْنَ اٰمَنُوْا یُخْرِجُھُمْ مِنَ الظُّلُمٰتِ اِلَی النُّوْرِ ط وَالَّذِیْنَ کَفَرُوْا اَوْلِیٰئُھُمُ الطَّاغُوْتُ یُخْرِجُوْنَھُمْ مِّنَ النُّوْرِ اِلَی الظُّلُمٰتِ ط اُولٰئِکَ اَصْحٰبُ النَّارِ ؛ ھُمْ فِیْھَا خٰلِدُوْنَ) (سُورة البقرة : ٢٥٧) '' اللہ تعالیٰ ولی (ساتھی اور مدد گار) ہے اُن کا جو اِیمان لائے، وہ اُن کو تاریکیوں سے نکال کر لاتا ہے نور ( اور روشنی) کی طرف۔ اور جنہوں نے کفرکی راہ اختیار کی تو اُن کے ولی (مدد گار اور ساتھی) سر کش اور مفسد (معبودانِ باطل) ہیں وہ اُن کو روشنی سے نکالتے اور تاریکیوں میں لے جاتے ہیں، سو یہ ہیں دوزخی ہمیشہ نارِ جہنم میں رہیں گے۔ ''