ماہنامہ انوار مدینہ لاہور جنوری 2012 |
اكستان |
 |
(٢) ……فَاِنَّہ مَنْ یَّعِشْ مِنْکُمْ بَعْدِیْ فَسَیرٰی اِخْتِلَافًا کَثِیْرًا فَعَلَیْکُمْ بِسُنَّتِیْ وَسُنَّةِ الْخُلَفَائِ الرَّاشِدِیْنَ الْمَھْدِیِّیْنَ تَمَسَّکُوْا بِھَا وَعَضُّوا عَلَیْھَا بِالنَّواجِذِ وَاِیَّاکُمْ وَمُحْدَثَاتِ الْاُمُوْرِ فَاِنَّ کُلَّ مُحْدَثَةٍ بِدْعَة وَکُلُّ بِدْعَةٍ ضَلَالَة ۔ ١
''جو لوگ میرے بعد زِندہ رہیں گے وہ (دینی اُمور میں) بہت اِختلاف دیکھیں گے تو (اِس حالت میں) تم پر میری سنت اَور ہدایت یافتہ خلفاء ِراشدین کی سنت کی اِتباع لازم ہے۔ تم اُن ہی سے تمسک و اِستدلال کرنا اَور اُس کو ڈاڑھوں سے دَبالینا (یعنی اِختلافات کے وقت میری سنت اَور خلفائِ راشدین کی سنت کو اِنتہائی پختگی اَور مضبوطی سے تھام لینا) اَور دین میں نکالے جانے والی نئی نئی باتوں سے پوری طرح اِجتناب کرنا کیونکہ دین میں پیدا کی جانے والی ہر نئی بات ''بدعت'' ہے اَور ہر بدعت گمراہی ہے۔''
یہ دونوں اَحادیث بھی اپنے مفہوم میں بالکل واضح ہیں۔ پہلی حدیث میں نجات پانے والے گروہ کی علامت یہ بتائی گئی ہے کہ وہ حضور پُرنور ۖ کی سنت اَور صحابۂ کرام رضی اللہ عنہم کی برگزیدہ جماعت کا ہوبہو پیروی کرنے والا ہوگا اَور اُس میں کسی قسم کی کمی یا بیشی نہیں کرے گا۔ یہ بات بالکل ظاہر ہے کہ کوئی نیا فرقہ اُس وقت تک وجود میں نہیں آسکتا جب تک وہ حضور پُرنور علیہ وعلیٰ آلہ الصلوٰة والسلام کے لائے ہوئے دین اَور صحابۂ کرام رضی اللہ عنہم کے بتائے ہوئے راستہ میں کمی یا زیادتی نہ کرے۔
دُوسری حدیث شریف سے معلوم ہوا کہ اُمت میں اِختلافات اُس وقت پیدا ہوں گے جب لوگ حضور ۖ اَور آپ کے صحابہ رضی اللہ عنہم کے راستہ سے ہٹ کر دین میں نئی نئی باتیں پیدا کریں گے۔ ایسے وقت میں حضور ۖ کا حکم ہمارے لیے یہ ہے کہ ہم صرف اَور صرف حضور ۖ اَور خلفاء راشدین کی سنت کی اِتباع کرتے رہیں اَور دین میں نکالے جانے والی ہر نئی بات سے مکمل طور پر پرہیز کریں۔
١ مشکوٰة ج ١ ص٣٠ ، ترمذی ج ٢ ص ٩٢ ، ابودائود ج٢ ص ٢٧٩ ، ابن ما جہ ص ٥۔