ماہنامہ انوار مدینہ لاہور مئی 2004 |
اكستان |
|
وفیات موت العَالِم موت العَالَم گزشتہ ماہ کی ١٧تاریخ کو جامعہ مدنیہ لاہور کے سابق مفتی و شیخ الحدیث حضرت مولانا مفتی عبدالحمید صاحب رحمة اللہ علیہ طویل علالت کے بعد تقریباً پچاسی برس کی عمر پاکر اپنے خالقِ حقیقی سے جاملے اناللّٰہ وانا الیہ راجعون حضرت مفتی صاحب رحمہ اللہ نہایت باعمل ، متقی اور انتہائی سادہ انسان تھے، تمام زندگی درس و تدریس میں گزری ۔آپ دارالعلوم دیوبند کے فاضل اور شیخ الاسلام حضرت مولانا سیّد حسین احمد صاحب مدنی قدس سرہ العزیز کے شاگرد تھے۔ آپ کی وفات سے طبقہ علماء کو شدید دھچکہ لگا ہے۔ دُعاء ہے کہ اللہ تعالیٰ آپ کی وفات سے پیدا ہونے والے خلا کو پر فرمائے اور آپ کی دینی خدمات کو قبول فرماکر اپنے شایانِ شان اجر عظیم عطا فرمائے نیزآپ کے پسماندگان کو صبر جمیل کی توفیق نصیب ہو۔ ز محترم الحاج قاری شریف احمد صاحب مدظلہم کے پوتے اور جناب حافظ رشید احمد صاحب کے بیٹے جناب حافظ منیر احمد صاحب گزشتہ ماہ کی آٹھ تاریخ کو طویل علالت کے بعد کراچی میں انتقال کرگئے انا للّٰہ وانا الیہ راجعون۔ ہردو حضرات کے لیے جوان سال اولاد کی وفات بہت بڑا صدمہ ہے ۔مرحوم نے پسماندگان میں بیوہ اور ایک بچہ چھوڑے ہیں، اللہ تعالیٰ ان کی کفالت فرمائے اور تمام اہلِ خانہ کو صبرِ جمیل کی توفیق نصیب ہو نیز مرحوم کو اللہ پاک اپنے جواررحمت میں جگہ عطاء فرمائے۔ ز حضرت اقدس مولانا سیّد حامد میاں صاحب کے برادر نسبتی اور پہلی اہلیہ مرحومہ کے بڑے بھائی جناب مولانا محمد یحیٰ صاحب بھی گزشتہ ماہ کی ٨ تاریخ کو دیوبند میں تقریباً اسی برس کی عمر پاکر وفات پا گئے انا للّٰہ وانا الیہ راجعون۔ مرحوم حضرت مولانا عبدالحق صاحب مدنی رحمة اللہ علیہ کے بڑے صاحبزادے تھے مرحوم کی وفات سے ان کا خاندان ایک شفیق سائے سے محروم ہوگیا ،دُعاء ہے کہ اللہ تعالیٰ مرحوم کی مغفرت فرماکر آخرت کے بلند ترین درجات سے نوازے اور پسماندگان کو صبرِ جمیل کی توفیق عطا فرمائے۔ ز