ماہنامہ انوار مدینہ لاہور جون 2011 |
اكستان |
|
اَنفَاسِ قدسیہ قطب ِ عالم شیخ الاسلام حضرت مولانا سیّد حسین احمدصاحب مدنی کی خصوصیات ( حضرت مولانا مفتی عزیز الرحمن صاحب بجنور ی ) فاضل دارُالعلوم دیوبند و خلیفہ مجاز حضرت مدنی اِحیا ئِ سنت : آنحضرت ۖ کا اِرشادِ گرامی ہے : مَنْ تَمَسَّکَ بِسُنَّتِیْ عِنْدَ فَسَادِ اُمَّتِیْ فَلَہ اَجْر مِائَةِ شَھِیْدٍ (مشکوة)''جس نے میری سنت کوفساد ِاُمّت کے وقت زندہ کیا اُس کو سو شہیدوں کا ثواب ملے گا۔'' اِس گئے گذرے دَور میں جبکہ لوگ فرائض کوبھی فراموش کیے ہوئے ہیں آپ نے نہ معلوم کتنی ایسی سنتوں کا احیاء کیا جن کو لوگ بالکل بُھلا چکے تھے ۔ جب کبھی آپ کو جمعہ کے روز نمازِ فجر پڑھانے کا اِتفاق ہوتا تو سورۂ دہر اَور سورۂ الم سجدہ ضرور تلاوت فرماتے اَور اِرشاد فرمایا کرتے تھے کہ ہندوستان بھر کے ائمہ مساجد نے اِس سنت کو ترک ہی نہیں کیا بلکہ بُھلا دیا ہے اِس وجہ سے پڑ ھتا ہوں کہ ائمہ مساجد اِس طرف توجہ کریں ۔ رمضان شریف میں صلوة الوتر میں سورہ اعلیٰ اَورسورۂ کافرون اَور سورۂ اخلاص بالترتیب اَکثر تلاوت فرماتے تھے اِسی طرح جمعہ کی نماز میں سورۂ اَعلی اَور سورۂ غاشیہ تلاوت فرماتے تھے ۔ علاوہ اَزیں ڈاڑھی مُنڈانے پر (جو فی زمانہ فیشن بن گئی ہے اَور لوگ ڈاڑھی منڈانے کو برانہیں سمجھتے) سخت نکیر فرماتے کوئی ڈاڑھی منڈا آپ کے پاس آتا تو بہت خفاء ہوتے اَور فرماتے کہ تمہیں رسول اللہ ۖ کی صورت سے نفرت ہے تو حسین احمد کے پاس کیوں آتے ہو ،تم نے سِکھ کو ڈاڑھی منڈاتے دیکھا ہے غرض کہ اِسی طرح تنبیہ فرماکر ہزاروں مسلمانوں کو ڈاڑھی مونڈنے کے گناہ سے باز رکھا ۔ اِسی طرح مہرِ فاطمی پر نہایت سختی سے عمل فرماتے تھے اُس نکاح کو نہ پڑھاتے تھے جس میں مہرِ فاطمی نہ