ہم جنس پرستی کی تباہ کاریاں اور ان کا علاج |
ہم نوٹ : |
 |
حضرت جلال الدین رحمۃاللہ علیہ انہیں جانتے نہیں تھے مگر تلاش تھی کہ کوئی اللہ کی محبت کا پانی پلانے والا مل جائے۔ ادھر شیخ شمس الدین تبریزی رحمۃاللہ علیہ اللہ سے دعا کرتے تھے کہ یا اللہ! کسی کو بھیج دیجیے کہ آپ کی محبت کی امانت اس کے حوالے کروں تو ان کو خواب میں بتایا گیا، انہوں نے خواب ہی میں اللہ تعالیٰ سے درخواست کی کہ یا اللہ! مجھے اپنا کوئی ایسا بندہ دے دیجیے کہ میرے سینے میں آپ کی محبت کی جو آگ ہے اسے قبر میں جانے سے پہلے اس کے سینے میں منتقل کردوں ۔ انہیں خواب ہی میں آواز آئی کہ اے شمس الدین! قونیہ جاؤ، وہاں ایک مولوی جلال الدین ہے، اس کے پاس جاؤ، جلال الدین رومی رحمۃاللہ علیہ کا نام بھی لیا اور قونیہ کا نام بھی لیا، سب غیب سے انہیں بتلایا گیا کہ وہ ہماری محبت کی پیاس رکھتا ہے، اور ہم سے دوری میں پریشان ہے، اس کو ہماری محبت سکھاؤ اور ہمارے قرب کی شراب پلاؤ۔ اب یہ قونیہ پہنچ کر چاول فروشوں کی منڈی میں بیٹھ گئے۔ چاول بیچنے والوں کو فارسی میں برنج فروش کہتے ہیں، اس لیے فیرینی کو شیر برنج کہتے ہیں، فیرینی جس میں پسا ہوا چاول، دودھ اور پسا ہوا بادام وغیرہ پڑا ہوتا ہے اسے لکھنؤ کی اردو میں فیرینی کہتے ہیں اور عام زبان میں کھیر کہتے ہیں اور دیسی زبان میں پھرنی، تین زبانوں میں آپ سےگفتگو کر رہا ہوں، پھر نہ کہنا کہ صاحب! نزول نہیں کرتے، میں ف کو پھ میں لے آیاہوں، اب اس سے زیادہ کیا نزول کروں؟ پھ کے بعد تو اور کوئی حرف نہیں لاسکتا۔تو برنج فروشوں کی منڈی میں ایک چبوتراتھا جہاں شہر کے معزز اور تاجر لوگ بیٹھتے تھے، وہاں شیخ شمس الدین تبریزی رحمۃاللہ علیہ بھی آکر بیٹھ گئے اور اپنے آپ کو چھپا رکھا تھا، پتا نہیں چلتا تھا کہ بہت بڑے بزرگ اور شیخ ہیں، کیوں کہ عام لوگوں کاسا لباس پہنا ہوا تھا۔ قلندر کی طرح سے اپنے آپ کو چھپانا ان کا حال تھا، لیکن یہ حال غلبۂ حال کی وجہ سے تھا، اس کی اتباع ضروری نہیں۔ علماء کا لباس کیسا ہونا چاہیے؟ علامہ شامی ابنِ عابدین رحمۃ اللہ علیہ شامی جلد نمبر پانچ کِتَابُ الْحَظْرِ وَالْاِبَاحَۃِ میں لکھتے ہیں کہ علما کا لباس لمبا، وسیع اور باوجاہت ہونا چاہیے اور لمبا اور وسیع کیوں فرمایا؟ تاکہ امت ان سے مسئلہ پوچھ سکے، اگر وہ چھوٹا سا اونچا کُرتا یا بوشرٹ پہن کر چلیں گے تو ان سے کون مسئلہ پوچھے گا، سب یہی کہیں گے کہ یہ تو کوئی کھوسٹ بر وزن بوشرٹ جارہا ہے، بوشرٹ کا وزن کھوسٹ پر ملتا ہے۔ لہٰذا ان کے لباس کو وسیع رکھا جائے، ان کا کُرتا لمبا چوڑا باوجاہت ہو