طبقہ میں کیا فرق ہے؟ خالق سے یہ بھی دور وہ بھی دور، مخلوقات کے بوجھ سے یہ بھی چور وہ بھی چور، کچھ فرق اگر ہے تو صرف اس قدر ہے کہ پرانوں کے معبود بھی پرانے تھے اور نئیوں کے معبود بھی نئے ہیں، پرانوں کو پرانے معبودوں میں عجائب و غرائب اور نت نئے فوائد نظر آئے تھے،اور نئیوں کو نئی مخلوقات میں عجائب و غرائب اورنت نئے فوائد نظر آئے، نظر آر ہے ہیں۔ مظاہرِ احترام اور تعظیم کے بیرونی قالبوں کی خصوصیتوں سے اگر قطع نظر کر لیا جائے تو ناپ لیا جا سکتا ہے۔ اگر قلبی احساسات اور ذہنی کیفیات کے ناپنے کا کوئی آلہ ہوتاکہ پرانوں کے دلوں میں پرانے معبودوں کے متعلق جو کچھ تھا نئیوں کے قلوب میں نئے معبودوں کے متعلق وہی کچھ بلکہ شاید کہ اس سے زیادہ ہو۔
پرانے بھی تنہا خدا کے نام پر بپھر جاتے تھے، نئیوں کے سامنے جا کر آج خدا کو تنہا کیا بلکہ ان کے معبودوں کے ساتھ ملا کر بھی نام لو تو پھر دیکھو کہ ان کی پیشانی کی کھال کس طرح سکڑ تی ہے اور منہ سے کتنے تولے کف کے اڑ اڑ کر بے چارے نام لینے والے کے چہرے پر پڑتے ہیں۔ تحریروں میں، تقریرروں میں، تذکروں میں، کیا نئیوں کا یہ گروہ اپنے معبودوں کے نام لیے بغیر کبھی گزر سکتا ہے؟ برق کا، بھاپ کا، تار کا، ریل کا، سیاروں کا، طیاروں کا، فیکٹریوں کا، ملوں کا،بینکوں کا، سرمایوں کا، ان کی مختلف شکلوں مثلاً انشورنسوں، ریسوں اور خدا جانے کن کن خدائوں کا نام آج جس دلچسپی کے ساتھ، جس ذوق شوق کے ساتھ لیا جاتا ہے مشکل ہے کہ خالق کے پوجنے والے نے اتنے ذوق و شوق کے ساتھ بسم اﷲ، الحمد ﷲ، سبحان اﷲ، لا إلہ إلا اﷲکا ذکر بھی کیا ہو۔ یہ حمد بھی کرتے ہیں تو ان ہی خدائوں کی، نعت بھی لکھتے ہیں تو ان ہی کی۔ پھر میں کیا غلط سمجھا جب میں نے کہا کہ جو پرانے تھے وہی نئے ہیں؟چند مخلوقات کے گرد پالتیاں مارے وہ بھی بیٹھے تھے اور ٹھیک اسی طرح فطرت کے چند نوامیس و قوانین کے تحت یہ بھی محوِ رقص رامتگری ہیں۔ وہ ان کا بھجن گاتے تھے یہ ان کا شکر کرتے ہیں۔
{اَتَوَاصَوْا بِہٖج بَلْ ہُمْ قَوْمٌ طَاغُوْنَج}
تم کہتے ہو پہلوں نے انسانیت کو ذلیل کیا، جو سب سے اونچا تھا وہ سب سے نیچا اوراسفلِ سافلین کے درجہ پر پہنچا یا گیا۔
بلاشبہ یہی ہوا، یہی ہونا بھی چاہیے کہ خالق ایک ہے اور مخلوق لا محدود ہیں، پر جس نے ایک کو چھوڑا اس کو ہر ایک سے جڑنا پڑے گا، جو ایک سے نہیں ڈرے گا اس کو ہر ایک سے ڈرنا پڑے گا، جو جھکنے ہی کے لیے ہے اس کو جھکنا ہی پڑے گا، لیکن ایک کے آگے جھکا تو سب اس کے آگے جھکیں گے اور جس نے ایک کے آگے سر ٹیکنے سے انکار کیا دیکھو وہ ہر ایک کے آگے سر ٹیکنے پر مجبور ہے، ملائکہ کے آگے، جن کے آگے، انس کے آگے، حیوانات کے آگے، نباتات کے آگے، جمادات اور میں کیا دکھائوں کہ جو دیکھا نہیں جا سکتا اسکے آگے۔1
