ہونا چاہیے عقل کے لیے یہ باور کرنا آسان ہے کہ غیب اور نامحسوس سے تڑپ کر یکایک یہ ترتیب محسوس اور عالمِ شہادت میں آجائے، اگر ایسا ہو گا تو ابھی غیب کی اور بہت سی غیر مرئی ہستیاں ، ایسی ہستیا ں جنہیں گو سب نہیں دیکھتے لیکن سب میں ان کے دیکھنے والے موجود ہیں، کیا وہ اس کے قابو سے باہر رہ جائیں گی جس کو سب پر قبضہ عطا کیا گیا ہے ؟ ما لکم کیف تحکمون؟
جنوں سے ملاقات اوربیعت
نہ کہا جا تا تو سوچا جاتا، سمجھا جاتا، مانا جاتا، لیکن جب کہا گیا اور صحیح روایتوں میں یقین کے ساتھ کہا گیا کہ تسخیر کا یہ سلسلہ اسی ترتیب کے ساتھ غیب سے شہادت کی طرف بڑھا اور شہادت تک تسخیری آثار اس عالم کی چیزوں سے گزر کر پہنچے جن کو ان دونوں دنیائوں کے درمیان برزخی واسطہ کی حیثیت حاصل ہے، توکیا عقل بھی اسی ترتیب کو نہیں ڈھونڈتی ہے؟ لوگوں نے بے پروائی کے ساتھ کیوں سناجب ان کو یہی سنایا گیا؟ صحیح حدیثوں میں ہے کہ ملک الجبال کے واقعہ کے بعد ہی نخلہ کے نخلستان میں اس برزخی تسخیر کا ظہور ہوااور ٹھیک ایسے وقت میں ظہور ہو ا جو رات کی تاریکی کو دن کی روشنی سے ملانے میں واسطہ اور برزخ کاکام دیتا ہے۔ ’’صحیح بخاری‘‘ میں ہے کہ صبح کا وقت تھا، کھجوروں کے جھنڈ میں فجر کی نماز کا قرآن گونج رہا تھا عین اس وقت
{صَرَفْنَآ اِلَیْکَ نَفَرًا مِّنَ الْجِنِّ یَسْتَمِعُوْنَ الْقُرْاٰنَج }
ہم نے تیری طرف جنوں کی ایک ٹولی پھیر ی تاکہ وہ قرآن سنیں۔
وہ چیخنے لگے:
{ اِنَّا سَمِعْنَا قُرْاٰنًا عَجَبًالا یَّہْدِیْٓ اِلَی الرُّشْدِ}
ہم نے پڑھنے کی ایک عجیب چیز سنی جو سوجھ کی راہ بتاتی ہے۔
اور ٹھیک جس طرح کچھ نہیں ہوتا لیکن شمع کے روشن ہونے کے ساتھ ہی بھانت بھانت کے کتنے کچھ پروانے جو نامحسوس تھے محسوس ہونے لگتے ہیں یہ بھی قرآن کی روشنی پر گرے اور پروانوں ہی کی طرح قربان ہوئے۔ جنوں میں آواز بلند ہوئی
{فَٰامَنَّا بِہٖ}
ہم نے اس کو مان لیا۔
اور قبل اس کے کہ دیدوں کی طرف تبلیغی مہم روانہ ہو نادیدوں کا یہ گروہ ان ہی نامحسوس علاقوں کی طرف تبلیغی مہم کے پہلے دستہ کی حیثیت سے روانہ ہو گیا۔
