ماہنامہ انوار مدینہ لاہور فروری 2015 |
اكستان |
|
حاصلِ مطالعہ ( حضرت مولانا نعیم الدین صاحب ،اُستاذ الحدیث جامعہ مدنیہ لاہور ) حِمص کے فقراء میں گورنر کا نام : حضور اَکرم ۖ کے ایک صحابی حضرت سعید بن عامر رضی اللہ عنہ اِنتہائی عابد وزاہد صحابی تھے۔ حضرت عمر رضی اللہ عنہ نے اِنہیں حمص کا گور نر بنادیا تھا لیکن اِس کے باوجود اِن کے زُہد میں کوئی فرق نہیں آیا تھا، دُنیا سے اِس قدر بے رغبت تھے کہ حیرت ہوتی ہے، کتابوں میں اِن کے زُہد کے عجیب و غریب واقعات ملتے ہیں ،ایک واقعہ علامہ اِبن الاثیر جزری نے نقل فرمایا ہے اُن کے حوالہ سے یہاں درج کیا جا رہا ہے ملاحظہ فرمائیے : ''شہر بن حوشب فرماتے ہیں کہ ایک دفعہ حضرت عمر رضی اللہ عنہ حمص تشریف لائے وہاں آپ نے اہلِ حمص سے فرمایا کہ اپنے یہاں کے فقیروں کے نام لکھ کر پیش کریں، کاتبوں نے فقراء کے نام لکھ کر پیش کر دیے ،حضرت عمر رضی اللہ عنہ نے نام ملاحظہ فرمائے تو اُن میں سعید بن عامر کا نام بھی تھا، آپ نے پوچھا سعید بن عامر کون ہیں ؟ اُن لوگوں نے جواب دیا : اَمیر المومنین وہ ہمارے گور نر ہیں۔ آپ نے فرمایا تمہارے گورنر فقیر ہیں ؟ بولے ہاں۔ حضرت عمر رضی اللہ عنہ کو تعجب ہوا فرمایا : تمہارے گور نر کیسے فقیر ہوسکتے ہیں، آخر اُن کی تنخواہ کہاں گئی، اُن کا وظیفہ کہاں گیا ؟ لوگ کہنے لگے اَمیرالمومنین وہ اپنے پاس کوئی چیز روک کر نہیں رکھتے (جو آتا ہے آگے چلتا کرتے ہیں)۔