Deobandi Books

''رحم کھانے والوں پر رحمن رحم کرتاہے تم زمین والوں کے ساتھ رحم کا معاملہ کرو،   تم پر آسمان والا رحمت کرے گا۔ '' 
اِس حدیث سے صاف معلوم ہوتا ہے کہ اِسلام، دوست اور دُشمن سب کے ساتھ بلکہ زمین میں بسنے والی سب مخلوق کے ساتھ رحم دِلی کی تعلیم دیتا ہے ۔ایک حدیث میں ہے رسول اللہ  ۖ  نے فرمایا کہ  : 
''کسی شخص نے ایک پیاسے کتے کو جوپیاس کی شدت سے کیچڑ چاٹ رہا تھا، اُس پر رحم کھا کر پانی پلادیا تھا تو اللہ تعالیٰ نے اُس کے اِس فعل کے بدلہ اُس کوجنت عطا فرما دی تھی۔'' 
اَفسوس  !  اللہ کی مخلوق پر رحم کھانے اور سب کے ساتھ ہمدردی کرنے کی صفت ہم سے نکل گئی اور اِسی واسطے ہم خدا کی رحمتوں کے قابل نہیں رہے۔ 
نرم مزاجی  : 
لین دین میں اور ہر طرح کے برتاؤ میں نرمی وآسانی کرنا بھی اِسلام کی خاص تعلیمات میں سے ہے۔ ایک حدیث میں ہے رسول اللہ  ۖ  نے فرمایا  : 
''نرمی کرنے والوں اور آسانی کرنے والوں پر دوزخ کی آگ حرام ہے۔''  
ایک دُوسری حدیث میں ہے  : 
''اللہ تعالیٰ نرمی کرنے والا ہے اور نرمی کو پسندکرتاہے اور نرمی پر اِتنا دیتا ہے جتنا  سختی پر نہیں دیتا۔'' 
تحمل  اور  برد باری  : 
ناگوار باتوں کو برداشت کرنا اور موقع پر غصہ کوپی جانا بھی اُن اَخلاق میں سے ہے جن کو اِسلام سب اِنسانوں میں پیدا کرنا چاہتا ہے اور اللہ کے نزدیک اُن اہلِ اِیمان کا بڑا درجہ ہے جو اپنے اَندر یہ صفت پیدا کرلیں ۔ قرآن شریف میں جہاں اُن لوگوں کا تذکرہ ہے جن کے لیے جنت سجائی گئی