Deobandi Books

شراب پئے ہوئے ہے۔ تو اُنہوں نے اُس پر شراب کی حد جاری کردی۔ (بخاری شریف ص ٧٤٨  ج٢) 
	حضرت عثمان رضی اللہ عنہ کے زمانہ میں ایک صحابی حضرت ولید رضی اللہ عنہ کے نشے کا واقعہ پیش آیا جس پر اہل مدینہ میں بھی بہت بے چینی پائی گئی۔ جلد باز لوگوں نے باتیں بھی بنائیں کیونکہ یہ حضرت عثمان رضی اللہ عنہ کے ماں شریک بھائی تھے، فتح مکہ کے موقع پر مسلمان ہوئے تھے۔ نشہ کے قصہ کے وقت گورنر کوفہ تھے۔ آخر حضرت عثمان رضی اللہ عنہ سے اہل مدینہ نے اِن کے بھانجے کے ذریعہ اپنے اضطراب کا اظہار کیا۔ آپ نے فرمایا  :
فَسَنَأْخُذُ فِیْہِ بِالْحَقِّ اِنْشَآئَ اللّٰہُ۔(بخاری ص ٥٢٢ و ص ٥٤٧ ج١)
''عنقریب اُن کے بارے میں ہم حق فیصلہ اختیار کریں گے۔'' 
	اِن واقعات کے ذکر کرنے کا منشاء یہ ہے کہ نبیذ کی وجہ سے نشہ اور اُس پر حد کے واقعات جب حضرت عمر جیسے خلیفہ کے پاک اور مضبوط ترین دور میں اُن کے گھر میں اور حضرت عثمان رضی اللہ عنہ خلیفۂ راشد کے پاک دور میں پیش آگئے تو نہ تو یزید خلیفۂ عادل و راشد تھا نہ صحابی نہ وہ حضرت قدامہ رضی اللہ عنہ کے برابر تھا نہ حضرت ولید رضی اللہ عنہ کے۔ وہ تابعی تھا، بڑے خاندان کا فرد تھا اور اُس کے بارے میںبہت سے لوگوں کی رائے اُس کے والد سیدنا معاویہ رضی اللہ عنہ کی حیات میں بھی اچھی نہ تھی۔ جب وہ سربراہ ِمملکت بنا تو مطلق العنان ہوتا چلا گیا لہٰذا اُس کے شربِ خمر میں کیا استبعاد ہے۔ حضرت محمد بن حنفیہ حضرت عبد اللہ بن حنظلہ سے چھوٹے ہیں اور صحابی نہیں ہیں۔ ابن حنظلہ رضی اللہ عنہ صحابی ہیں اور یزید کے پاس بعد میں گئے ہیں۔ اِن کی بات کو ہی اہل مدینہ نے ترجیح بھی دی ہے۔ 
مدینہ اور اہل ِشام  : 
	اہل مدینہ کا عمل اور تقویٰ اہل شام سے بہت بڑھا ہوا تھا۔ ان کی عملی حالت امام مالک رحمة اللہ علیہ کے دور تک اتنی اچھی رہی ہے کہ امام مالک اہل مدینہ کے عمل کو حدیث صحیح پر ترجیح دیتے تھے۔ حالانکہ اِن کے زمانہ میں دوسری صدی چل رہی تھی، اس کی دلیل صحابۂ کرام اور تابعین کی شہادت تھی جو اُنہوں نے اہل مدینہ کے متعلق   وقتا فوقتًا دی کہ اِن کے عمل میں زمانہ رسالت مآب  ۖ  سے لے کر بہت بعد تک کوئی فرق نہیں آیا۔ مثلاً حضرت انس رضی اللہ عنہ کا بیان جو آگے آتا ہے ،امام مالک کی دلیل ہے۔ دوسری طرف حضرت انس اور حضرت ابوالدرداء رضی اللہ عنہما کے ایسے بیانات بھی موجود ہیں جو شام کی عملی حالت کے بہت کمزور ہوجانے کی دلیل ہیں۔