ماہنامہ انوار مدینہ لاہور اپریل 2006 |
اكستان |
|
درود شریف کی اِس سے بڑھ کر کیا فضیلت ہوگی کہ اللہ جل شانہ' نے حضور اقدس ۖ کے پاک نام کو اپنے پاک نام کیساتھ کلمۂ شہادت میں شریک کیا اور آپ کی اطاعت کو اپنی اطاعت، آپ کی محبت کو اپنی محبت قرار دیا۔ ایسے ہی آپ پر درود کو اپنے درود کیساتھ شریک فرمایا۔ پس جیساکہ اپنے ذکر کے متعلق فرمایا اُذْکُرُوْنِیْ اَذْکُرْکُمْ ایسے ہی درود کے بارے میں ارشاد فرمایا جو آپ پر درود بھیجتا ہے اللہ اُس پر دس دفعہ درود بھیجتا ہے۔زیر نظر چہل حدیث درود شریف پڑھنے کے فضائل اور نہ پڑھنے کی وعیدوں پر مشتمل ہے۔ اللہ تعالیٰ ہمیں کثرت سے نبی الرحمة ۖ پر درود پڑھنے کی توفیق عطا فرمائے۔( مرتب) فضائل ِ درود شریف ( جناب محمدراشد صاحب ،ڈیرہ اسماعیل خان ) (١) حضور اقدس ۖ کا ارشاد ہے جو شخص مجھ پر ایک دفعہ درود پڑھے اللہ جل شانہ' اُس پر دس دفعہ صلوٰة بھیجتے ہیں۔ (مسلم) ف : اللہ جل شانہ' کی طرف سے تو ایک ہی درود اور ایک ہی رحمت ساری دُنیا کے لیے کافی ہے چہ جائیکہ ایک دفعہ درود پڑھنے پر اللہ تعالیٰ کی طرف سے دس رحمتیں نازل ہوں۔ (فضائل درود شریف ص١٢) (٢) حضرت عبد اللہ بن عمر و سے نقل کیا گیا ہے کہ جو شخص حضور اقدس ۖ پر ایک دفعہ درود بھیجے اللہ تعالیٰ شانہ اور اُس کے فرشتے اُس پر ستر دفعہ درود (رحمت) بھیجتے ہیں۔ (فضائل درود شریف ص١٢) (٣) حضور اقدس ۖ کا ارشاد ہے کہ جس کے سامنے میرا تذکرہ آوے اُس کو چاہیے کہ مجھ پر درود بھیجے اور جو مجھ پر ایک دفعہ درود بھیجے گا اللہ جل شانہ' اُس پر دس دفعہ درود بھیجے گا اور اُس کی دس خطائیں معاف کرے گا اور اُس کے دس درجے بلند کرے گا۔ (فضائل درود شریف ص١٣) ف : حضرت براء رضی اللہ عنہ کی روایت میں اِس میں اضافہ ہے کہ یہ اُس کے لیے دس غلام آزاد کرنے کے بقدر ہوگا۔