اسلام ایک حقیقت پسند مذہب ہے
اسلام کی ایک نمایاں اور امتیازی خصوصیت یہ ہے کہ وہ ایک حقیقت پسند مذہب اور نظامِ حیات ہے، عقائد، عبادات، معاملات اوراحکام واخلاق ہر اعتبار سے اسلام حقیقت پسند ہے، اور اس کی ہر تعلیم وہدایت میں واقعیت پسندی کا عنصر اور نور بہت واضح اورروشن ہے۔
اسلامی عقائد کا اگر تجزیہ کیا جائے تو وہ از اول تا آخرواقعیت پر مبنی ہیں ، ہر اسلامی عقیدہ ایسی حقیقت ہے جسے عقل بآسانی قبول کرتی ہے، دل اس پر مطمئن رہتا ہے، فطرتِ سلیم اس پر لبیک کہتی ہے، وہ اوہام وخیالات سے بالکل دورہے، اسلام کا سب سے بنیادی عقیدہ توحید ہے جو تمام حقائق سے بڑی حقیقت ہے، اللہ کی تکوینی نشانیاں ، دلائلِ انفس وآفاق، عقلی، نقلی، مشاہداتی وتجرباتی براہین سب اللہ کی وحدانیت کو کائنات کی سب سے بڑی اور نمایاں حقیقت ثابت کرتے ہیں ، اللہ کے اوصافِ جلال وجمال، رحمت وغضب، قدرت وقوت، غلبہ وکبریائی، تخلیق وایجاد، عفو ومغفرت، شفقت ورأفت، حلم وعطا، جود وکرم، قہاری وغفاری، قدوسی وجبروت، سب ہی بدیہی حقائق ہیں جن کو ہر عقلِ سلیم بے چون وچرا تسلیم وقبول کرنے پر مجبور ہے۔
عقیدۂ رسالت دوسری بنیاد ہے، اسلام محمد عربی صلی اللہ علیہ وسلم کو نبی آخر الزماں اور خاتم الانبیاء والرسل قرار دیتا ہے، انہیں اخلاقِ عالیہ کا حامل اور مکمل بتاتا ہے، اور ثابت کرتا ہے کہ وہ عام انسانوں کی طرح تھے، ان کی رفتار وگفتار، چال چلن، چلت پھرت، خورد ونوش،
