ماہنامہ انوار مدینہ لاہور اگست 2017 |
اكستان |
|
حرف آغاز نَحْمَدُہ وَنُصَلِّیْ عَلٰی رَسُوْلِہِ الْکَرِیْمِ اَمَّا بَعْدُ ! حضرت زیاد بن حُدَیر رحمة اللہ علیہ فرماتے ہیں کہ مجھ سے حضرت عمر رضی اللہ عنہ نے فرمایا کہ کیا تم جانتے ہو کہ اسلام کو کیا چیز منہدم کر دیتی ہے ؟ میں نے عرض کیا کہ نہیں، فرمایا اسلام کو عالِم کی لغزش اور منافق (بدعتی )کا (دین ظاہر کر کے در پردہ بدعات کو رواج دے کر) کتاب اللہ کا مقابلہ کرنا اور فیصلہ کرنا (دینی معاملات میںسیاسی قیادت کے) گمراہ اماموں کا۔ ١ حضرت زیاد بن لبید رضی اللہ عنہ فرماتے ہیںکہ نبی علیہ السلام نے کچھ چیزوں کا ذکر فرما کر فرمایا کہ یہ علم کے(اُٹھ) جانے کے وقت ظاہر ہوں گی ،میں نے عرض کیا یا رسول اللہ علم کے جانے کی کیا صورت ہوگی حالانکہ ہم قرآن پڑھتے ہیں اور اپنے بچوں کو پڑھاتے ہیں اور ہمارے بچے اس کو اپنے بچوں کو پڑھائیں گے قیامت تک، آپ نے فرمایا تیری ماں تجھے روئے میںتو تجھ کو مدینہ کے لوگوں میں سب سے زیادہ دانا سمجھتا تھا کیا یہ یہود و نصارٰی توراة وانجیل نہیں پڑھتے مگر ان میں درج (تعلیمات میں سے) کسی پر بھی عمل نہیں کرتے ٢ (اسی طرح مسلمانوں میں سے بھی علم اُٹھ جائے گا کیونکہ صرف قرآن کی تلاوت کریں گے مگر اس میں درج تعلیمات پر عمل نہ کریں گے) ۔ ------------------------------١ دارمی بحوالہ مشکوة ص ٣٧ ٢ مسند ِ احمد وابن ماجہ بحوالہ مشکوة ص ٣٨