حُباریٰ یعنی تیتر جیساایک پرندہ کھانے کا حکم :
حُباریٰ کامصداق : یہ تیتر جیسا خاکی رنگ کا ایک صحرائی پرندہ ہے ، جو بہت تیز اڑتا ہے ،جس کی ٹانگیں اور گردن لمبی ہوتی ہیں ،اِس کے بارے میں دو چیزیں بہت مشہور ہیں :
بے وقوفی میں :چنانچہ محاورات میں کہا جاتا ہے :کل شیئ یحب ولدہُ حتی الحُباریٰ ۔
تحصیل ِ رزق میں : چنانچہ محاورات میں کہا جاتا ہے :فلانٌ أطلَب من الحُباریٰ ۔(تحفۃ الالمعی :5/170)(الدر المنضود 50)
حُباریٰ کا حکم :اس کا کھانا بالاتفاق حلال ہے ۔(تحفۃ الالمعی :5/170)
قُنفُذیعنی خار پشت کا حکم :
قُنفُذ کا مصداق :
یعنی قُنفُذ کسے کہتے ہیں ؟ اِس کے مصداق میں دو قول ہیں :
خار پشت :اِس کو فارسی میں خار پشت اور اردو میں سیہی کہا جاتا ہے ، اِس کی پشت میں کانٹے ہوتے ہیں ۔
خار دار چوہا :یعنی بالوں والا چوہا جس کی پشت پر موٹے موٹے بال ہوتے ہیں جن کو وہ خوف کے وقت اپنی حفاظت کے لئے کھڑا کر لیتا ہے اور گیند کی طرح سے گول ہوجاتا ہے ۔(الدر المنضود:51)
قُنفذ کا حکم :
شافعیہ اور مالکیہ :حلال ہے ۔
احناف اور حنابلہ : حرام ہے ۔(الدر المنضود:51)