حقوق الوالدین |
ہم نوٹ : |
ہے، فرماتے ہیں کہ اس آیت سے تصوف کا ایک مسئلہ ثابت ہوتا ہے کہ جیسے جسمانی پالنے والے ماں باپ کے لیے دعا کا حکم ہورہا ہے اسی طرح جو تمہارا شیخ و مرشد ہے، جو تمہاری روحانی تربیت کرتا ہے، اس کے لیے بھی دعا مانگنا اسی آیت سے ثابت ہوتا ہے۔ لہٰذا مشایخ جن سے انسان اصلاحِ نفس کرائے اور ان سے دین سیکھے ان کے لیے بھی دعاگو رہنا چاہیے۔ جب ماں باپ کے لیے دعا مانگے تو اپنے شیخ کے لیے بھی دعا مانگے۔ حضرت رحمۃ اللہ علیہ نے لکھا ہے کہ ربوبیت کےمعنیٰ ہیں پرورش، ماں باپ جسمانی پرورش کرتے ہیں، شیخ روحانی پرورش کرتا ہے، پس جنہوں نے بھی پرورش کی ہے خواہ جسمانی یا روحانی، ان سب کے لیے دعا مانگنا چاہیے۔ یہ ہیں علوم حکیم الامت رحمۃ اللہ علیہ کے۔ دیکھ لو مسائل السلوک کہ اپنے مرشدوں کے لیے دعا کرو کہ اے اللہ! ہمارے شیخ پر، شیخ کی اولاد پر اور گھر والوں پر رحمت نازل فرما۔ مولانا رومیرحمۃ اللہ علیہ کی اپنے شیخ اور ان کے شہر والوں کے لیے دعا مولانا رومی رحمۃ اللہ علیہ اپنے شیخ شمس الدین تبریزی رحمۃ اللہ علیہ کے لیے دعا فرماتے ہیں کہ اے خدا! میرا پیر شمس الدین، جو شہر تبریز میں رہتا ہے تو صرف شمس الدین تبریزی اور ان کی اولاد پر رحمت کو خاص نہ فرما بلکہ پورے شہر والوں پر رحمت نازل کردے، یعنی میرے پیر شمس الدین تبریزی پر اور ان کے گھروالوں پر اور تمام شہر والوں پر رحمت نازل فرما ؎ ہر زمانے موجِ روح انگیز جاں از فرازِ عرش بر تبریزیاں عرشِ اعظم سے رحمت اور جان میں حیاتِ ابدی اور راحت بھر دینے والی اپنی خوشبو کو تبریز والوں پر بھی نازل کردے، یعنی پورے شہر تبریز کے ایک فرد کو بھی محروم نہ فرما۔ کیوں صاحب! آج تو پیر کے لیے بھی دعا کرنے والے کم ہیں اور کون ایسے لوگ ہیں جو پیر کے پورے شہر کے لیے دعا کریں۔ ہمارا فرض ہے کہ ہم مکے شریف والوں کے لیے بھی دعا کریں اور مدینے شریف والوں کے لیے بھی دعا کریں کہ اے خدا! حرمین شریفین کی حفاظت فرما، وہاں کے رہنے والوں کی بھی حفاظت فرما اور ان کی محبت اور ان کا ادب ہم کو نصیب فرما۔