ماہنامہ انوار مدینہ لاہور جولائی 2004 |
اكستان |
|
وفیات موت العالِم موت العالَم جامعة العلوم الاسلامیہ بنوری ٹائون کراچی کے شیخ الحدیث حضرت مولانامفتی نظام الدین شامزی رحمة اللہ علیہ کو گزشتہ ماہ کی٣٠ تاریخ کو گھر سے جامعہ آتے ہوئے نامعلوم دہشت گردوں نے شہید کردیا انا للّٰہ وانا الیہ راجعون۔ مفتی شامزی صاحب بہت جامع صفات شخصیت تھے درس و تدریس کے ساتھ ساتھ بہت سی دینی ذمہ داریاں آپکی ذات سے وابستہ تھیں آپکی شہادت سے ملک ایک بہت بڑی دینی شخصیت سے محروم ہوگیا ۔آپکے قاتل تاحال گرفتار نہیں ہوسکے جو حکومت کی بڑی ناکامی کی دلیل ہے ،اس سے قبل دیگر علماء دیوبند پر ہونے والے بہت سے حملوں میں ملوث مجرموں کو بھی تاحال گرفتار نہیںکیا جا سکا۔ حکومت کی ذمہ داری ہے کہ وہ علماء حق کے قاتلوں کو فی الفور گرفتار کرے بصورتِ دیگر اپنی ناکامی کا اعتراف کرتے ہوئے مستعفی ہوجائے ۔ دعا ہے کہ اللہ تعالیٰ حضرت مفتی صاحب کی شہادت کو قبول فرما کر آخرت کے بلند ترین درجات عطا فرمائے اُن کے پسماندگان اور دیگر سوگواروں کو صبرِ جمیل کی توفیق نصیب ہو ۔جامعہ مدنیہ جدید اور خانقاہ حامدیہ میں حضرت مفتی صاحب کے لیے دعاء مغفرت اور ایصال ثواب کرایا گیا اللہ تعالیٰ قبول فرمائے۔ آمین۔ ٭ عالمی مبلغِ ختم نبوت ممتاز عالمِ دین حضرت مولانا منظوراحمد صاحب چنیوٹی طویل علالت کے بعد ٢٧جون کو شریف میڈیکل سٹی کمپلیکس لاہور میں انتقال فرما گئے ۔ انا للّٰہ وانا الیہ راجعون ۔ مولانا طویل عرصہ سے گردوں کے عارضہ میں مبتلا تھے مولانا کی تمام زندگی ناموسِ ختم نبوت کے لیے وقف رہی۔ اس میدان میں آپ کا ممتازمقام سب کے نزدیک مسلم تھا۔ آپ کی وفات سے پیدا ہونے والا خلا بہت مشکل سے پوراہوگا ۔ اللہ تعالیٰ آپ کی دینی خدمات کو قبول فرمائے اور آپ کوجنت الفردوس میں اعلیٰ مقام عطا فرمائے۔آپ کے پسماندگان کو صبرِ جمیل کی توفیق نصیب ہو۔آمین۔ ٭ تاخیر سے ملنے والی اطلاع کے مطابق محترم شفیق صاحب مقیم لندن کی خوشدامن صاحبہ طویل علالت کے بعد ٢٥اپریل کو انتقال فرما گئیں انا للّٰہ وانا الیہ راجعون ۔مرحومہ کی وفات پر اہلِ ادارہ محترم شفیق صاحب اور ان کے اہلِ خانہ کے غم میں برابر کے شریک ہیں ۔اللہ تعالیٰ مرحومہ کی مغفرت فرماکر جنت الفردوس میں جگہ عطا فرمائے آمین اور ان کے پسماندگا ن کو صبرِ جمیل کی توفیق نصیب ہو۔ ٭