بسم اللہ الرحمن الرحیم
تمام تعریفیں اللہ کے لئے ہیںجوسارے جہاں کا رب ہے ، اور درود وسلام نازل ہو رحمۃ اللعالمین حضرت محمد مصطفی ﷺ پر اور آپؐ کے پاک وصاف آل واولاد پر ۔
علم فرائض اور اس کی اہمیت
علم فرائض: وہ علم ہے جس کے ذریعہ میت کا چھوڑا ہوا مال اس کے شرعی ورثاء کے درمیان تقسیم کرنے کا طریقہ معلوم ہو اور اس کو علم المواریث بھی کہتے ہیں ۔
موضوع : علم ِفرائض کا موضوع میت کا چھوڑا ہوا مال اور اس کے ورثاء ہیں، اس علم میں ان ہی دونوں سے بحث کی جاتی ہے ۔
غرض وغایت : مستحقین تک ان کے حقوق پہونچانا اور چھوڑے ہوئے مال کی تقسیم میں غلطی سے بچنا ہے ۔
علم ِ فرائض کی فضیلت :
علم ِفرائض بڑی فضـیلتوں والاعلم ہے ، شریعت کے دیگر احکام کو اللہ تعالی نے اجمالاً نازل کیا؛ لیکن علم ِفرائض کو تفصیلاً بیان کیا ہے ، حضور ﷺ نے فرمایا کہ فرائض کو سیکھو اورسکھلاؤ ؛ کیونکہ وہ آدھاعلم ہے ۔
ترکہ : میت کے چھوڑے ہوئے مال کو کہتے ہیں ۔
ورثاء : میت کے وہ رشتہ دار جو انتقال کے بعد اس کے مال کے حصص شرعیہ کے مطابق مستحق ہو تے ہیں ۔