ماہنامہ انوار مدینہ لاہور اگست 2011 |
اكستان |
|
علمی مضامین سلسلہ نمبر٤٤ (قسط : ٣،آخری ) ''اَلحامد ٹرسٹ''نزد جامعہ مدنیہ جدید رائیونڈ روڈ لاہورکی جانب سے شیخ المشائخ محدثِ کبیر حضرتِ اَقدس مولانا سیّد حامد میاں صاحب رحمة اللہ علیہ کے بعض اہم خطوط اَور مضامین کو سلسلہ وار شائع کرنے کا اہتمام کیا گیا ہے جو تاحال طبع نہیں ہوسکے جبکہ اِن کی نوع بنوع خصوصیات اِس بات کی متقاضی ہیں کہ افادۂ عام کی خاطر اِن کو شائع کردیا جائے۔ اسی سلسلہ میں بعض وہ مضامین بھی شائع کیے جائیں گے جو بعض جرا ئد و اخبارات میں مختلف مواقع پر شائع ہو چکے ہیں تاکہ ایک ہی لڑی میں تمام مضامین مرتب و یکجا محفوظ ہو جائیں۔ (اِدارہ) نفاذِ شریعت کا سیدھا راستہ کلمات ِچند بر قانونِ اِسلامی تکمِلہ '' کلماتِ چند '' موجودہ شریعت بل کی شق نمبر ٤ یہ ہے : '' مسلَّمہ فقہائِ اِسلام کی تشریحات '' ٭ اَب سوال یہ پیدا ہوتا ہے کہ مسلَّمہ فقہائے اِسلام تو بہت ہیں جیسے ترمذی شریف میں جابجا سفیان ثوری، سفیان بن عیینہ، شعبہ، ابن ِمبارک، اِسحاق وغیرہ کا ذکر ہے۔ ترمذی کے علاوہ اَور کتابوں میں شام کے مکحول اَور اَوزاعی مصر کے لیث اَور اِن جیسے بیسیوں اَکابرِ اُمت کے اَقوال و تحقیقات کا ذکر ہے اِن کے علاوہ تابعین اَور تبع تابعین میں ایسے حضرات کی تعداد تو بہت ہی زیادہ ہے۔ حاکم نیسابوری نے اپنی مایۂ ناز کتاب ''معرفت علوم الحدیث'' میں یکجا کرنے کی کوشش کی ہے۔حاکم (٣٢١ھ پیدائش/ ٤٠٥ھ وفات) نے یہ کہہ کر کہ اِن کی حدیثیں لکھی جاتی ہیں اِن کا ذکر باعث ِ برکت ہے اَور یہ شرقًا غربًا معروف ہیں اپنی اِس کتاب میں ص ٢٤٠ سے فہرست دی ہے۔ اَسمائِ علمائِ مدینہ میں چودہ سطریں، اہل ِ مکہ میں چھ سطریں، اہل ِ مصر پانچ سطریں، اہل ِ شام بیس سطریں، اہل ِ یمن نو سطریں، اہل ِ یمامہ دو سطریں، اہل ِ کوفہ بہتر سطریں، اہل ِ جزیرہ دس سطریں، اہل ِ بصرہ بائیس سطریں، اہل ِ واسِط چار سطریں، اہل ِ خراسان اُنیس سطریں لکھی ہیں۔ ہر سطر میں اگر تین نام اَوسطًا رکھے جائیں تو یہ ساڑھے پانچ سو کے قریب علماء بنتے ہیں۔