ماہنامہ انوار مدینہ لاہور جون2009 |
اكستان |
 |
ایسا پہلی بار ہوا کہ ٹی وی چینلز کے خبر خوانوں کے چہرے بھی تمتمانے لگے اُن کے منہ سے کف نکلنے لگی اور اُن کی آنکھیں شرارے اُگلنے لگیں۔ کسی کو یاد نہ رہاکہ معاملہ کتنا ہی سنگین کیوں نہ ہو ممکنہ حد تک اعتدال اور توازن کا دامن تھامے رکھنا لازم ہے۔ دیکھتے دیکھتے وہ لبرل فاشٹ بھی مفسر، محدث، فقیہ اور مجتہد...... جو نمازوں کی رکعتیں بھی نہیں گنوا سکتے، ہر شخص شیخ القرآن اور شیخ الحدیث بن بیٹھا اور اَلمیہ سوات کی اسلامی تعلیمات کے تناظر میں تشریح و تعبیر کرنے لگا۔ یوں لگا جیسے برسات کی بھوک کے مارے بھیڑیوں کو شکار ہاتھ آگیا ہو۔ ایک سے بڑھ کر ایک مفتی ٔزماں مجتہد العصر اور نابغۂ وقت بن بیٹھا۔ ایک آتش فشاں تھا کہ پھٹ پڑا اور لاوا اِسلام، اسلامی نظام تعزیرات، اسلامی شعائر اور اِسلامی مظاہر کی طرف بہہ نکلا یہاں تک کہ عوام چیخ اُٹھے سرشام اُن کا پیمانۂ صبر لبریز ہو گیا۔ وہ دہائی دینے لگے۔ خواتین زاری کر رہی تھیںکہ خدا کے لیے یہ سب بندکرو۔ سوات کے نام و نہاد طالبان یا خود ساختہ نظام ِ عدل کے پاسبانوں نے تو ''کوڑوں '' کی کوئی حد مقرر کی ہوگی لیکن میڈیا نے اہل پاکستان کی پشت پر اِتنے کوڑے برسائے کہ وہ بِلبلا اُٹھے اور یہ سلسلہ اَب بھی نہیں تھما۔ میرے کل کے کالم کا عنوان تھا ''چیف جسٹس کیا کیا کریں'' اُس وقت یہ ویڈیو سامنے نہیں آئی تھی۔ اَب جسٹس افتخار محمد چوہدری نے اِس معاملہ کا نوٹس بھی لے لیا ہے اور سماعت کے لیے سینئرججوں پر مشتمل ایک بڑا بنچ تشکیل دے دیا ہے۔ کیا سوات کی اِنتظامیہ مظلوم لڑکی کو پیش کر سکے گی؟ کیا ذمہ داروں کو گرفت میں لیا جا سکے گا؟ حکومت کے لیے بہرحال ایک کھڑ کی کھلی ہے وہ سپریم کورٹ آف پاکستان کے بل بوتے پر شورش زدہ علاقے میں اپنی .........کی بحالی کی سنجیدہ کوشش کر سکتی ہے۔ سماعت کے دوران شاید کئی ایسے سوالوں کے جواب بھی مل جائیں جو میڈیا کے اُٹھائے گئے گر دو غبار میں دَب گئے ہیں۔ پتہ چلناچاہیے کہ یہ واقعہ کب پیش آیا؟ سوات اَمن معاہدے سے قبل یا بعد میں؟عدالت سجانے اور سزا دینے والے لوگ کون تھے؟ سر حد حکومت نے اِس پر کیا کارروائی کی؟ علاقے میں موجود فوج کا ردّ عمل کیا رہا؟ خفیہ ایجنسیوں کی رپورٹ کیا ہے؟ اور سب سے بڑھ یہ کہ اُس این جی اَو کا شجرہ نسب کیا ہے جس نے یہ ویڈیو عام کر نے کے لیے ایک خاص وقت کا انتخاب کیا؟ کس طرح اُس کی بیسیوں کاپیاں تیار ہوئیں؟ کیونکر یہ ایک ہی دن، ایک ہی وقت مختلف چینلز تک پہنچا دی گئیں؟ اور پھر کس طرح ایک سونامی نے پاکستان کو لپیٹ میں لے لیا؟