ماہنامہ انوار مدینہ لاہور نومبر 2002 |
اكستان |
|
تقریظ وتنقید نام کتاب :تجلیات ِرمضان المبارک افادات : مولانا عبدالکریم ندیم صاحب مرتب : قاری جمیل الرحمن اختر صاحب صفحات : ٣٠٤ سائز : ١٦/ ٢٣٣٦ ناشر : انجمن خدام الاسلام حنفیہ قادریہ جی ٹی روڈ باغبان پورہ لاہور قیمت : /١٣٠ پیشِ نظر کتاب ''تجلیات رمضان المبارک ''ملک کے مصروف خطیب مولانا عبدالکریم ندیم زید مجدہم کے رمضان المبارک سے متعلق سات خطبات پر مشتمل ہے جن کی تفصیل درج ذیل ہے : (١) استقبال رمضان المبارک (٢)روزہ کے فضائل او ر اہمیت (٣) حقوقِ قرآن (٤) سترہ رمضان کے اہم واقعات (٥)لیلةالقدر اور اعتکاف (٦) جمعةالوداع او ر احکام عید الفطر (٧) فضیلت دعاء ،آخر میں رمضان المبارک میںوفات پانے والے پچاس بزرگوں کا مختصر تذکرہ دیا گیا ہے ، ان خطبات میں مولانا موصوف نے روزہ ،رمضان اور قرآن سے متعلق تفصیل سے بیان کیا ہے اورعوام النا س کو بتلایا ہے کہ روزہ کی کیا اہمیت ہے اس کے کیا فوائد اور کیا فضائل ہیں ۔ رمضان المبارک کیسا بابرکت مہینہ ہے اس مہینہ میں اللہ تعالی اہل ایمان پر کیا کیا انعامات فرماتے ہیں اور اس مہینہ میں کیسے کیسے بڑے واقعات پیش آئے ہیں۔قرآن کا رمضان سے کیا تعلق ہے اور اس کے کیا حقوق ہیں دعا کی کیا فضیلت ہے اور اس کے کیا آداب ہیں۔انداز بیاں دلکش ہے کتاب کو پڑھ کر عمل کا جذبہ اُبھرتا ہے۔ کتاب ظاہری و باطنی خوبیوں سے مزین ہے البتہ بعض مقامات پر کتابت کی اغلاط پائی جاتی ہیں بالخصوص ادعیہ ٔماثورہ میں کافی غلطیاں ہیں ،آئندہ ایڈئشن میں ان کی اصلاح کی طرف ضرور توجہ دی جائے۔