شراب اور منشیات کے مضر اثرات
شراب اور نشے کی لعنت انسان کو چوطرفہ نقصانات سے دوچار کرتی ہے اورتباہ و برباد کرڈالتی ہیں ،اس کی نحوست سے انسان دینی، روحانی، اخلاقی، جسمانی، مالی اور معاشرتی ہر لحاظ سے کمزور ہوتا چلا جاتا ہے، احادیث میں صاف فرمایا گیا ہے:
اَلْمُوْمِنُ الْقَوِیُّ خَیْرٌ مِنَ الْمُوْمِنِ الضَّعِیْفِ۔(مسلم)
تندرست مومن، کمزور ولاغر مومن سے بدرجہا بہتر ہے۔
اس لعنت کے منحوس اثرات اور مضرات بے انتہا ہیں ، ذیل میں چند کا ذکر کیا جاتا ہے:
جسمانی نقصانات
میڈیکل سائنس باتفاق رائے یہ طے کر چکی ہے کہ شراب ونشہ ایک سست رفتار زہر ہے، اور اس سے انسان کا بدن کھوکھلا ہوتا چلا جاتا ہے اور تیزی سے انسان کے قدم موت کی طرف بڑھتے چلے جاتے ہیں ، منشیات کا سب سے بڑا ضرر انسان کی صحت اور جسم و قوت کو پہونچتا ہے، واضح رہنا چاہئے کہ انسان کی زندگی، صحت، جسم اور طاقت اس کی اپنی ملک نہیں ، بلکہ اس کے پاس اللہ کی امانت ہیں ، اس امانت میں خیانت کسی بھی صورت جائز نہیں ہے، اسی لئے قرآن نے فرمایا ہے:
وَلَاتُلْقُوا بِأَیْدِیْکُمْ إِلَی التَّہْلُکَۃِ۔ (البقرۃ/۱۹۵)
اپنے آپ کوہلاکت میں مت ڈالو۔
