ماہنامہ انوار مدینہ لاہور نومبر 2017 |
اكستان |
 |
٭ حضرت ابو ہریرہ رضی اللہ تعالیٰ عنہ سے روایت ہے کہ رسول اللہ ۖ نے فرمایا : ''مجھے چھ چیزوں میں انبیاء علیہم السلام پر فضیلت دی گئی ہے : (١) مجھے جامع کلمات عطا کیے گئے (٢) رعب کے ساتھ میری مدد کی گئی (٣) مالِ غنیمت میرے لیے حلال کردیا گیا (٤) رُوئے زمین کو میرے لیے مسجد اور پاک کرنے والی چیز بنادیا گیا (٥)مجھے تمام مخلوق کی طرف مبعوث کیا گیا (٦) اور مجھ پر نبیوں کا سلسلہ ختم کردیا گیا ہے۔'' ١ ٭ حضرت سعد بن ابی وقاص رضی اللہ تعالیٰ عنہ سے روایت ہے کہ آنحضرت ۖ نے حضرت علی رضی اللہ عنہ سے فرمایا : ''تم مجھ سے وہی نسبت رکھتے ہو جو ہارون کو موسیٰ علیہ السلام سے تھی مگر میرے بعد کوئی نبی نہیں۔'' ٢ ٭ مسلم شریف میں روایت ہے کہ ''میرے بعد نبوت نہیں۔ '' (صحیح مسلم ج ٢ ص ٢٧٨) ٭ حضرت ابو ہریرہ رضی اللہ عنہ رسول اکرم ۖ سے بیان کرتے ہیں کہ حضور علیہ السلام نے فرمایا : ''بنی اسرائیل کی قیادت خود اُن کے انبیاء کیا کرتے تھے جب کسی نبی کی وفات ہوتی تو اُن کی جگہ دوسرا نبی آتا تھا لیکن میرے بعد کوئی نبی نہیں البتہ خلفاء ہوں گے۔'' ٣ ٭ حضرت ثوبان رضی اللہ تعالیٰ عنہ سے روایت ہے کہ حضور علیہ السلام نے فرمایا : ''میری اُمت میں تیس جھوٹے پیدا ہوں گے ہر ایک یہی کہے گا کہ میں نبی ہوں حالانکہ میں خاتم النبیین ہوں میرے بعد کوئی کسی قسم کا نبی نہیں۔'' ٤ ٭ حضرت انس بن مالک رضی اللہ عنہ سے روایت ہے کہ رسول اللہ ۖ نے فرمایا : ''رسالت و نبوت ختم ہوچکی ہے پس میرے بعد نہ کوئی رسول ہے اور نہ نبی۔'' ٥ ------------------------------١ صحیح مسلم ج ١ ص ٩٩ ا۔ مشکوة ص ٥١٢ ٢ صحیح بخاری ج ٢ ص ٦٣٣ ٣ صحیح بخاری ج ١ ص ٤٩١ ۔ صحیح مسلم ج ٢ ص ١٢٦ ۔مسند ِاحمد ج ٢ ص ٢٩٧ ٤ ابو داؤد ج ٢ ص ٢٢٨۔ ترمذی ج ٢ ص ٤٥ ۔ ٥ ترمذی ج ٢ ص ٥١ ۔ مسند ِ احمد ج ٣ ص ٢٦٧